Afganistan: de clubs de lectura clandestins coma armas de resisténcia de las femnas

Privadas d’escòla, de trabalh e d’espaci public, de femnas afganas crèan de clubs secrets ont la lectura ven un acte de resisténcia 

Dempuèi la represa del poder pels talibans, en agost de 2021, las afganas son estadas progressivament escafadas de la vida publica  

En Afganistan, malgrat la repression dels talibans, de femnas contunhan de desfisar l’interdich en s’amassant dins de clubs de lectura clandestins, çò rapòrta Radio France. Dempuèi la represa del poder pels talibans, en agost de 2021, las afganas son estadas progressivament escafadas de la vida publica: pòdon pas pus frequentar l’escòla après l’edat de 12 ans, son exclusas de la majoritat dels emplecs, dels pargues, de las bibliotècas o encara dels cafès, e se devon desplaçar unicament acompanhadas d’un pròche parent masculin. Lor quita votz es emmuralhada dins l’espaci public.

Fàcia a aquel estofament pesuc, d’unas an causit la lectura coma acte de resisténcia. Segon El País, a Kabol o de l’exili estant, crèan de cercles virtuals o discrets per legir e partejar d’obratges defenduts, sovent jos forma de fichièrs PDF numerizats. Fahr, una diplomada en drech de 29 ans, aviá fondat una bibliotèca per femnas a Kabol en 2019. Aquela bibliotèca barrada per l’arribada dels talibans, Fahr salvèt 4000 libres e los transformèt en un ret numeric accessible per WhatsApp e Telegram. Uèi, près de 300 femnas participan a aquel grop secret. «Organizam de sesilhas de lectura secretas unicament amb de membres de qui nos fisam totalament», çò precisa Fahr, qu’apond: «Crenhèm que los talibans ajan d’espions demest nosautras. En mai, cèrtas femnas crenhon d’anar als rencontres en presencial, per paur d’èsser arrestadas pels servicis d’entresenhas talibans».

Aquelas legeiras afrontarián de pesucs risques se foguèsson descobèrtas: delicte de possession de libres proïbits, delicte de participacion a de cercles defenduts o menaça de repression contra elas e lors familhas. Pasmens, la demanda de lectura aumenta. Per d’unas, coma Fahima, de 18 ans, empachada de venir mètja, aqueles clubs son una escapatòria e una font d’inspiracion. A ja legit 35 obratges e escriu un raconte sus la vida d’una jove afgana jol regim taliban sonat Lo camin de la Lutz (The Path of Light).

[Imatge: USAID- sorsa: www.jornalet.com]