La senténcia contra aquela activista dels dreches umans es largament condemnada per las organizacions internacionalas
La Cort Suprèma d’Iran confirmèt lo 16 d’agost passat la pena de capitala contra Sharifeh Mohammadi, una activista dels dreches de las femnas e dels trabalhadors, annadida de 45 ans. Ara es en risc imminent d’execucion.
Engenhaira de dessenh industrial e maire d’un filh de 13 ans, Sharifeh Mohammadi foguèt arrestada lo 5 de decembre de 2023 per d’agents del Ministèri de l’Intelligéncia a Rasht. Pendent los meses de detencion, foguèt plaçada en isolament e patiguèt de torturas fisicas e psicologicas qu’avián la tòca de la forçar a de falsas confessions, çò denóncia Amestia Internacionala.
La 39a seccion de la Cort Suprèma a doncas confirmada la senténcia, malgrat que, de per abans, en octòbre de 2024, lo meteis tribunal aviá revocada la primièra condemnacion per “manca d’evidéncias” e d’“irregularitats dins las avaloracions dels organismes de seguretat”. Segon l’avocat de Mohammadi, Amir Raeesian, los jutges an mantenguda la senténcia “malgrat totas las ambigüitats e objeccions que rèstan.”
D’acusacions controversiadas
Mohammadi foguèt condemnada per Baghi, un concèpte del còde penal iranian que fa referéncia a la transgression e a l’infraccion dels dreches dels autres, a la rebellion, o a la susmauta armada contra un governant o un imam legitim. Las “evidéncias” mençonadas contra ela comprenon d’activitats pacificas coma:
- son anciana militància al Comitat de Coordinacion per Ajudar a Formar d’Organizacions de Trabalhadors fins a 2011,
- la possession d’afichas contra la pena de capitala,
- la defensa documentada de cases de femnas encarceradas per de rasons politicas dins la província de Gilan,
- la detencion d’informacions sus la participacion dels trabalhadors dins las protèstas “Femna, Vida, Libertat“ de 2022.
Lo procès judiciari, en mai d’aquò, foguèt marcat per d’irregularitats grèvas. Lo primièr jutjament se tenguèt en una sola sesilha de 30 minutas ont l’avocat de Mohammadi aguèt solament 10 minutas per presentar la defensa. Dins lo segond jutjament, qu’aguèt luòc lo 14 de novembre de 2024, li refusèron la possibilitat d’i assistir en persona e li calguèt participar per videotelefonada de la preson estant pendent solament 20 minutas.
Significativament, lo jutge que presidiguèt lo segond jutjament, Mohammad Ali Darvish Goftar, es filh del jutge Ahmad Darvish Goftar, que prononcièt la primièra senténcia de pena capitala.
D’organizacions internacionalas de dreches umans an condemnada la senténcia e an demandada sa revocacion immediata.
Mohammadi se tròba a l’ora d’ara dins la preson de Lakan a Rasht, dins la província de Gilan, en esperant l’execucion. Sos avocats an anonciat que presentarián un recors davant la Cort Suprèma per ensajar de far revocar la senténcia. La confirmacion de la pena de mòrt es estada largament condemnada per las organizacions internacionalas dels dreches umans.
[Sorsa: www.jornalet.com]
Sem comentários:
Enviar um comentário