Del 14 al 18 de julhet se tendrà la 5a edicion d’HIGA, amb 75 participants e 55 lengas representadas, dont l’occitan
La vila basca de Gasteiz tornarà aculhir per la cinquena annada lo rescontre internacional dels joves parlants de lengas minorizadas (HIGA segon sa sigla en basco). L’eveniment se debanarà del 14 e al 18 de julhet e prepausa mai de 55 lengas representadas per 75 participants venguts dels cinc continents. L’occitan i serà representat especialament per Gabrièu Pelisson e Cléo Najavas-Trinquier.
Après lo succès de l’edicion precedenta, HIGA torna amb la volontat de crear un espaci d’escambi, de formacion e de projèctes collaboratius per la reviudacion de las lengas minorizadas. L’edicion d’ongan marcarà un ponch d’inflexion amb de novetats formativas importantas e una participacion encara mai internacionala.
Creat en 2011, lo rescontre se ten dins l’encastre dels corses d’estiu de l’Universitat del Bascoat (UPV/EHU) e es sostengut per l’associacion HIGA e la comuna de Gasteiz. Son objectiu es totjorn de refortir lo ròtle dels joves dins la transmission e la defensa de lors lengas.
Art e activisme lingüistic
Per aquela cinquena edicion, HIGA voldrà explorar lo ligam entre creacion artistica e activisme lingüistic, e dobrirà de vias per lançar de projèctes que se pòscan perseguir après lo rescontre. Totes los participants seràn inscriches oficialament dins un cors d’estiu universitari amb un certificacion reconeguda.
Al programa : de conferéncias, de taulas redondas, d’obradors de creacion collectiva, d’activitats culturalas e de concèrts. Las sesilhas seràn accessiblas en basco, castelhan e anglés amb interpretacion simultanèa.
Reconegut amb lo prèmi Linguapax de 2024 e sostengut pel decenni Internacional de las lengas indigènas de l’UNÈSCO, HIGA es vengut un referent mondial dins l’encastre de la diversitat lingüistica amb un agach jove, internacional e interseccional.
Mai d’entresenhas e lo programa complet sus www.higatopaketa.eus
[Sorsa: www.jornalet.com]
Sem comentários:
Enviar um comentário