Niça: lo prefècte ordena lo retirament de la bandièra israeliana del fronton de la comuna

Lo prefècte dels Alps Maritims invòca la neutralitat del servici public e demanda al cònsol màger de Niça de retirar la bandièra israeliana issada dempuèi octòbre de 2023 

Lo prefècte dels Alps Maritims, Laurent Hottiaux, a exigit lo retirament de la bandièra israeliana penjada al fronton de la comuna de Niça dempuèi las atacas de l’Hamàs del 7 d’octòbre de 2023. Dins un corrièr adreiçat al cònsol màger Christian Estrosi (Orizons), invòca lo «principi de neutralitat dau servici public». Lo prefècte a tanben anonciat lo mandadís d’una circulara a totes los cònsols màgers del departament per ramentar l’enebicion de las bandièras estrangièras suls bastiments publics.

Segon Le Monde, Christian Estrosi afirmèt que la bandièra demorariá en plaça tant que i auriá d’ostatges retenguts a Gaza per l’Hamàs. Reagís a l’interdiccion en reafirmant son engatjament contra «toti li formas d’antisemitisme e d’antisionisme». Mantun recors son estats depausats davant lo tribunal administratiu de Niça, contestant la preséncia de la bandièra israeliana en nom del respècte del principi de neutralitat dels bastiments publics e de las libertats fondamentalas, mas solament un a balhat luòc a una decision; foguèt en mai de 2024, quand un jutge regetèt un referit per «manca d’urgéncia».

La situacion niçarda fa resson a la de Gennevilliers, ont la prefectura dels Nauts de Sèina demandèt lo retirament d’una bandièra palestiniana issada davant l’ostal de la comuna. Lo cònsol màger, Patrice Leclerc (Partit Comunista), denoncièt alavetz una politica de «dos peses, doas mesuras», ramentant que cap de demanda similara èra pas estada formulada pendent l’abandeiratge amb las colors d’Ucraïna en 2022.

Le préfet des Alpes-Maritimes demande le retrait du drapeau israélien du fronton de la mairie de Nicehttps://t.co/zzfLShgHgx pic.twitter.com/jfrfoIHq0m

— BFMTV (@BFMTV) June 17, 2025

style="-webkit-text-stroke-width: 0px; box-sizing: inherit; font-stretch: normal; font-variant-caps: normal; font-variant-ligatures: normal; margin: 0cm 0cm 11.25pt; text-align: justify; text-decoration-color: initial; text-decoration-style: initial; text-decoration-thickness: initial; word-spacing: 0px;"> 

 

 

[Sorsa: www.jornalet.com]