Madeleine Peyroux: «A miña música podería definirse como jazz popular»

A enigmática e sempre fascinante cantante e compositora actúa o sábado no auditorio Mar de Vigo en formato de trío

Escrito por CARLOS CRESPO 

«O blues e o jazz teñen a capacidade de reanimar a cultura do pop», dixo xa fai uns cantos anos Madeleine Peyroux. E a súa carreira desde entón non fixo senón corroboralo. Non só porque os seus discos máis celebrados fosen aqueles nos que reinterpretaba cancións de distintos xéneros da música popular achegándoas a territorios musicais máis sedosos e negroides, senón porque as súas composicións propias encamiñáronse tamén nesa mesma dirección. Como poderiamos definir o seu estilo?, preguntámoslle nunha entrevista que nos concede a través de cuestionario. «Supoño que poderiamos chamalo jazz popular. Estou profundamente influenciada polo jazz e polo blues, os xéneros estadounidenses máis grandes, e é necesario que a miña música teña as súas raíces nese contexto», responde.

A esta querenza polo popular seguro que non foron alleos os seus inicios como cantante rueira no Barrio Latino de París, onde se trasladou coa súa nai desde a súa Xeorxia natal. Canto queda hoxe nela daquela cantante de rúa?, inquirimos. «Agardo que todo», aduce.

Aínda así, considera Madeleine Peyroux que a referencia ao pop á hora de falar da súa música é unha simplificación excesiva. «Pero iso é culpa da industria», engade. «A música non é só unha mercancía. Se a cultura capitalista moderna empezase a recoñecer a importancia das artes, poderiamos atopar moitas máis subcategorías e sistemas de pensamento sobre o que é a música e o que une ás persoas».

Tan enigmática como fascinante, sempre tímida e imprevisible, Madeleine Peyroux chega o sábado ao auditorio Mar de Vigo para presentar en directo Let's walk, o primeiro disco da súa carreira no que todas as cancións son da súa autoría. Un disco no que se mostra máis libre e difícil de acoutar que nunca. Un disco no que aborda a crítica social e maniféstase cunha notable dose de compromiso. 

   

«Let's walk, let's roll» (Camiñemos, rodemos), canta Madeleine Peyroux na canción que dá título ao álbum. Pero, cara a onde? «Primeiramente, e primeiro de nada, cara a estar xuntos, celebrar o feito de estar vivos. E a axudarnos mutuamente para poder celebrarnos aínda máis. Nós, o pobo, somos moitos e eles, os oligarcas, son poucos», manifesta.

A cantante e compositora de Athens presentarase acompañada no escenario polo seu «dúo favorito»: Jon Herington (guitarra) e Barak Mori (contrabaixo). Sen batería. «O novo disco está lixeiramente adaptado a este formato de trío e ten un son hipnótico e marabillosamente cálido», comenta Peuyroux. «Estamos encantados de volver tocar xuntos con estas excelentes cancións novas e antigas». 

 

 [Fonte: www.lavozdegalicia.es]