Macron refusa que se constituisca un govèrn d’esquèrra

La França Insomesa, la fòrça màger del Nòu Front Popular, assegura que votarà contra tot primièr ministre que siá pas d’esquèrra

Lo president francés, Emmanuel Macron, refusa que se constituisca un govèrn d’esquèrra, mai que mai que siá primièr ministre una persona del Nòu Front Popular (NFP) jos l’escampa qu’aquò seriá rebutat sul pic per l’Assemblada Nacionala. Davant aquela situacion, Macron anoncièt ièr que uèi començariá un nòu periòde de consultas amb los diferents partits per ensajar de trobar un candidat. 

La decision de Macron a causat la colèra de l’esquèrra, mai que mai de la França Insomesa (LFI), lo partit màger del Nòu Front Popular. LFI avertís que votarà contra tot  candidat que siá pas d’esquèrra, una decision que poiriá provocar un blocatge institucional. Per Jean-Luc Mélenchon, lidèr d’LFI, s’agís d’una situacion d’una “excepcionala gravetat”. Lo meteis partit anóncia tanben que demandarà al parlament la destitucion del president, malgrat l’escassa probabilitat politica que capite ben, per manca de partits en sa favor. 

E mai s’entamene de nòvas consultas, Macron a assegurat qu’accediriá pas a las demandas de l’esquèrra per nomenar l’economista Lucie Castets coma primièra ministra. E mai l’NFP siá la fòrça mai votada, tant Macron coma los autres partits de drecha considèran que lo programa de l’esquèrra es “lo mai perilhós”. 

La Constitucion francesa establís que lo cap de l’estat pòt designar lo primièr ministre que vòl, mas en practica los candidats an de besonh de la ratificacion de l’Assemblada Nacionala francesa, que pòt censurar los govèrns.

[Sorsa: www.jornalet.com]