Tango

 

Prezentado por Forti BAROKAS

El tango nasyo en las kayes de Buenos Aires en Arjentina, en el anyo 1800 en medyo del siglo XIX, i kontinuo por Evropa i el mundo entero en el siglo XX. El tango es una forma de emosyon ke se mostra kon la muzika. El instrumento de la muzika del tango es el bandoneon ke es paryente del akordeon. El akordeon es un invento alman ma se dyo a konoser kon el tango arjentino.

El tango es un bayle kombinado kon la muzika de Buenos Aires, Arjentina, Montevideo i Uruguay.

El tango orijinal se konose komo “tango arjentino” por el nombre de la tyerra ande nasyo. En baylando ay un sentimyento dramatiko, ay la pasyon del amor i la melankoliya.

« Tango » vyene de la palavra “tangere” ke sinyifika tokar en la lingua latina.

A la fin del siglo XIX, munchos emigrantes de Evropa i de Afrika vinyeron a Buenos Aires. Estos emigrantes se sintyeron muy solos en este muevo pais, bushkaron remedyos para sentirsen orozos i toparon un muevo stilo de muzika. Ritmos afrikanos, ritmos amerikanos i ritmos latinos, kombinados kon el ritmo de la muzika arjentina, en esta manera se formo el tango.

Este bayle, en los primeros tyempos se baylava en las kayes i en lugares arebashados. Los ke baylavan eran ombres borrachos, las mujeres sin onor, mujeres de vida. Por esto, en los primeros tyempos no era rekonosido. Kuando se izo popular, kon tyempo entro al sentro kultural i se izo bayle de salon. Sovretodo en Paris tuvo un grande sukseso en los anyos 1940.

El tango es dirijado por el ombre, es un bayle ke se bayla kon muzika dramatika; por esto, los ke baylan no riyen; syempre estan seryozos. El tango no es solo un bayle, en mezmo tyempo es un stilo de vida.

Bueno, el tango kuando vino a Turkiya?

El tango vino a Turkiya en mezmo tyempo ke la Evropa en el siglo XX kon palavras etranjeras. Despues syertos kompozitores komo Fehmi Ege, Necip Celal Andel, Necdet Koyutürk, kompozaron tangos siguro kon palavras turkas i en esta manera, se formo la muzika turka de tango.

La semana pasada, el 13 de ogusto tuve el onor de partisipar al konserto de tangos turkos ke organizo « Adalar kültür derneği ».

Ay dos enveranos ke me vo al koro de la Büyükada, tomo lisyones de muzika turka en esta asosyasyon. Este anyo el direktor ke mos da lisyon, tomo una desizyon i izo un repertuar de tangos turkos. Veramente la muzika turka es una kultura profonda ke no tiene fin. Seya los kompozitores, seya las palavras de las kantikas, komo se fondaron, por ken se eskrivyeron, todas tyenen enformasyones i sinyifikasyones diferentes. Las palavras de los tangos turkos yenas de amor, de pasyon.

A mozos los koristos, mos dyo muncho plazer de kantarlas en la shena, en la plaza de “Çınar meydanı” en medyo la kaye, aviya kaji 1000 personas, a la fin del konserto, tomimos munchas palmas i rengrasyos, los espektadores se fueron a sus kazas alegres i gustozos i antuzmazyados.

 

[Orijin: http://www.salom.com.tr]