Sent Pèr d’Irúber: lo rectorat refusa una classa immersiva en basco perque seriá “inconstitucionala”

Lo rectorat de Bordèu invòca la Constitucion francesa per s’opausar a un projècte de classa immersiva demandat pels parents

La rectritz de l’acadèmia de Bordèu (circonscripcion escolara que pertòca tanben lo Bascoat Nòrd) s’es opausada a la dobertura d’una classa immersiva en basco a Sent Pèr d’Irúber (en basco Hiriburu). Lo president de l’Ofici Public de la Lenga Basca (OPLB), Beñat Arrabit, a manifestat als mèdias son “incompreneson” e son “indignacion”. La decision academia daissa 18 joves del vilatge de petita e mejana seccions sens escolarizacion en lor lenga. Aquel tipe d’ensenhament se realiza ja dins 38 escòlas publicas e privadas del costat nòrd del Bascoat.

La rectritz s’es opausada al projècte en invocant la lei del 26 de julhet de 2019 “per una escòla de la fisança” que rend l’institucion obligatòria dempuèi l’edat de 3 ans e en i associant lo fach que “la Constitucion de 1958 prevei dins son article que l’instruccion obligatòria es dispensada en francés «lenga de la Republica»“. Per aquelas rasons, lo rectorat a dich que “pòt pas pus autorizar de nòvas experimentacions”.

La reaccion de l’OPLB es estada ferma. D’un caire, meton en question que la Constitucion francesa diga que “la lenga d’instruccion” siá lo francés. D’autre caire, jutjan “brutalas ”la decision e son argumentacion,  e remembran que la classa es una iniciativa dels parents d’escolans del public.

L’histoire retiendra que sous la présidence Macron et sous le gouvernement Castex, les ouvertures de classes immersives dans les maternelles publiques ont été stoppées. Qu’en pensent les soutiens locaux du ”Premier Ministre des territoires” ? https://t.co/peNW20Uvm5… @naiz_info. pic.twitter.com/PU57vYdWlb

— Max BRISSON (@max_brisson) July 16, 2020

[Imatge: Bob EDME - poblejat dins www.jornalet.com]