Crisi sanitària: la leiçon de Portugal

Lo país es vengut un modèl de bona gestion de la pandemia de la Covid-19

Lisbona

La setmana a començat en Portugal amb las botigas dobèrtas, los perruquièrs, las librariás, las bibliotècas... lo 18 de mai, dobriràn las grandas botigas, las terrassas, los cafès e los restaurants amb una limitacion del 50% de lor capacitat; a la fin del mes tornarà la liga de fotbòl. Cossí s’es pogut refar tan lèu de la crisi sanitària? Aquel país lusitan es a la una de fòrça mèdias coma modèl de bona gestion de la crisi sanitària de la Covid-19. S’es infectat 25 000 ciutadans dont un milièr son mòrts, un taus d’infeccions e de mortalitat dels pus basses de l’Union Europèa se comparam amb los autres païses.

 

Lo govèrn portugués declarèt l’estat d’emergéncia quand i aviá sonque 50 personas infectadas e cap de mòrta per la Covid-19, e barrèt sa frontièra amb Espanha, que reagiguèt tròp tard.

 

Cal tanben soslinhar l’unitat politica fàcia a l’urgéncia. An virat pels rets socials las paraulas del cap de l’oposicion, Rui Rio, al primièr ministre António Costa: “Coratge, nèrvis d’acièr e fòrça bon astre, perque vòstre bon astre es nòstre bon astre”.

 

 

Espanha se justifica: “Portugal es mai a l’oèst”

 

Interrogada per un jornalista sus la granda diferéncia amb Espanha, qu’es dels païses mai grèvament afectats per la Covid-19, la vicepresidenta del govèrn espanhòl e ministra de la transicion ecologica, Teresa Ribera, diguèt: “Portugal o arrestèt. Aquò veniá de l’èst e eles son un pauc mai a l’oèst e o poguèron alavetz arrestar un pauc abans”. Espanha compta aperaquí 250 000 infectats e mai de 25 000 mòrts.

 

S’o comparam amb Grècia, qu’es pas brica a l’oèst d’Espanha, veirem la diferéncia. Lo país ellèn compta un pauc mai de 2500 infectats e mens de 150 mòrts.

 

De fach, Grècia e Portugal an donat una leiçon d’umilitat e de bona gestion de la crisi sanitària a fòrça “grands” païses de l’UE.

[Imatge: EFE - poblejat dins www.jornalet.com]