Argentina: condemnada per un avortament, morís a l’espital manotada al liech

Es defuntada a causa d’una peritoniti contractada en preson que las autoritats ignorèron fins que foguèsse tròp tard

Patricia Solorza, una femna argentina de 40 ans, es mòrta manotada al lièch dins un espital de Buenos Aires per negligéncia a causa d’una peritoniti contractada en preson que las autoritats ignorèron fins que foguèsse tròp tard.

 

Èra en preson dempuèi quatre ans per un avortament quand lo fètus aviá cinc meses, mas ela afirmava que s’èra fach espontanèament. Per aquela causa l’avián acusada d’omicidi, la considerant colpabla d’aver tuat son enfant.

 

Solorza aviá demandat d’èsser assignada a domicili mas li o concediguèron pas. Fasiá longtemps que reclamava una solucion a son encarceracion, car aviá tres mainats, dont un amb deficiéncia. Per se poder trachar d’eles, Solorza aviá acceptat un jutjament abreujat, car li avián dich que tot se passariá pus lèu. Mas li serviguèt pas a res.

 

Èra embarrada dins la preson de San Martín dempuèi l’an 2015, condemnada a uèch ans. Aquí fasiá partida de l’esquipa de rugbi e participava a un obrador de dessenh textil.

[Imatge: Página 12 - poblejat dins www.jornalet.com]