A miúdo
esquécese un nome cando se fala dos máis sólidos escritores británicos do
panorama literario actual, entre os que si se inclúe merecidamente a Julian
Barnes, Ian McEwan, Graham Swift ou Martin Amis. É o de David Lodge (Londres,
1935), de quen a editorial Impedimenta vén de traer ao castelán Un home
con atributos, unha obra
magna, ciclópea, case tanto como o xenio do seu protagonista, H. G. Wells,
autor de fitos da ficción tan universais, verdadeiros clásicos populares,
como A máquina
do tempo (1895), A illa do
doutor Moreau (1896), O home
invisible (1897)
e A guerra dos mundos (1898).
Esta peculiar biografía, que excede en moito os límites do
ensaio, fragua nun novelón que se constrúe desde un excéntrico punto de
vista: o das mulleres que frecuentaron a súa vida e o seu leito.
Corre o ano
1944 (apenas dous antes do seu falecemento), e, no enclaustramento, retirado
do mundanal ruído na súa céntrica residencia de Regent's Park, Herbert George
Wells (1866-1946) emprende un evocador relato da súa (azarosa, prolixa e
exitosa) existencia. A pesar de que o propio Wells xa volveu sobre si mesmo
no seu moi amplo Experimento en autobiografía (publicado en España polo selo Berenice), a súa
apaixonante existencia xustifica de xeito sobrado a lectura de Lodge, cuxos
humor e intelixencia xa avalarían plenamente o goce.
Noutro ton ben diferente,
Lodge xa visitara cun acerto notable -na súa novela ¡O autor,
o autor!- a agridoce
aventura teatral de Henry James, quen, por certo, mantivo amizade con Wells.
Nun home con atributos achará o lector tamén ao pai da ciencia ficción moderna, pero sobre
todo unha intromisión na intimidade de quen foi un recoñecido sedutor, un
impenitente mullereiro e, nunha das súas moitas contradicións vitais, tamén
un feminista.
«Un home con
atributos»
David Lodge
Tradución de
Mariano Peyrou
Editorial Impedimenta
598 páxinas
28
euros
|
Sem comentários:
Enviar um comentário