La shoa de los djudeo-spanyoles

Por Haïm Vidal Marc Sephiha

En omenaje a mi ermano Jacques Sephiha, rezistente dezde la primera ora I mos decho el 20 de agosto del anyo 2000.

Invitado por France-Culture, 55 anyos despues, aboltava yo a Auschwitz-Birkenau, ke kedo en mis eshuenyos negros durante anyos i anyos, sin eskapasyon. Terrivle fue tal vijita, ainda mas, kuando detenyendome delantre de las 19 lajas en 19 linguas diferentes, etchadas delantre del Memoryal de akel kondjunto, vide ke no aparesiya la lingua de los miyos.

Si! no aviya laja en djudezmo! Entonses me entro una birra! De ke? De ke? Dinguno pudo arresponder a mi pergunta, dinguno entendyo ke semos guerfanos de padre, de madre i de abuelos. ”Ande sta la tomba de mi vava?”, me diziya una amiga selanekliya, grito ke ivan dando a sus torno los ke la sintiyan. Portanto, 160.000 Djudyos de los muestros fueron degoyados en akeyos erremos kampos. Ijo de Djudyos vinidos d’Estambol i deportado de Malines a Auschwitz-Birkenau en 1943, yo mizmo avli muestra dulse lingua kon Selaneklis k’enkontri ayi. Si, 160.000 de los muestros muryeron ayi. De Gresya fueron deportados 62.573 de los muestros; 10.371 aboltaron. Mas de 50.000 muryeron.

• De Yugoslaviya, mas de 55.000 de los muestros muryeron deportados.
• De los ke fueron deportados de Rumaniya, a lo manko 15.000 de los muestros muryeron.
• De la Bugariya no uvo ni uno, grasyas a la rezistensya del puevlo bulgaro.
• Ama, los Djudyos bulgaros ke bviyan en los paizes okupados, si ke fueron deportados!
• I aki, ay ke dizir ke los Djudyos de los Balkanes emigrados a la Evropa (oksidental) fueron arrevatados por la okupasyon i mizmo, asta muntchos Djudyos turkos.
• Asigun Michael Molho (in memoriam), las estimasyones eran las sigentes:

60.000 en a Fransya, 3.000 en la Beljika, 2.000 en la Olanda, 5.000 en la Alemanya i 15.000 en la Austria. En 1950, esta numerasyon amengua muntcho i vino a ser respektivamente, 20.000, 500, 7000, 1.000 i 200.

Por falta de estudyos demografikos seryos devidos a la grande movilidad de estas povlasyones, muntchas vezes tambyen a una klasifikasyon indistinkta bacho Djudyos o Sefaradim, estas sumas son aproksimativas. Las primeras dadas para la Alemanya i la Austria son anteryores a las emigrasyones provokadas por las persekusyones de los nazis en kada uno de estos paizes. Una ves guadradas en tino estas observasyones, puedmos afirmar ke en la Evropa oksidental, sin kontar los de la Italya, 60.000 de los muestros fueron eksterminados. Por esto izimos esta petisyon votada unanimamente en el Sigundo Kolokyo Internasyonal del Djudeo-Espanyol de Selanik, el 17 de avril del anyo 2000.  

KADA UNO DE MOZOTROS TYENE EL DOVER DE FIRMARLA!

Sumas dadas en Le Judaïsme Séphardi, nouvelle Série, n°7, 1950, p.103

[Orijen: www.diariojudio.com]