Keridos amigos
Ya s’eskaparon mis vakansas repozadas en mis montanyas, i amanyana djueves ya vino el tyempo de una mueva emisyon. La vo azer sovre tres djudyos ke se muryeron este enverano, un franses, Claude Lanzmann, i dos israelyanos, Moshe Mizrahi i Uri Avnery.
Edmond Cohen
Paris – Fransya
Paris – Fransya
——————————————————————————————
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke las emisyones de Radio J se pueden oir por internet sovre el sityo de Radio J, de toda manera en direkto, i tambyen despues en la redifuzyon de la mediudiya entera.
Me alegro de toparvos de muevo, keridos oyentes, despues de dos mezes de vakansas ke, por lo ke es de mi, fueron muy ermozas, en julyo en Paris, Lyon i en el sur de Fransya, en agosto en mis keridas montanyas. Oy mos topamos a pokos diyas de Rosh Hashana, i no kyero empesar mi emisyon sin dezearvos en primero, keridos oyentes, anyada buena, kon salud i kon vida, para vozotros todos i vuestras famiyas.
Esto dicho, a kada vez ke vos desho mas de dos mezes sin azer una emisyon, ay djente importante ke mos desha la buena vida, i no puedo empesar de muevo mis emisyones sin avlar de eyos. Este anyo, fueron tres djudyos ke mos desharon este enverano, de los kualos vos tengo de avlar oy, son Claude Lanzmann el 5 de djulyo, Moshe Mizrahi el 3 de agosto i Uri Avnery el 20 de agosto.
Empesaremos dunke por Claude Lanzmann, ke era muy famozo en Fransya, ama penso ke deviya serlo tambyen en el kusur del mundo.
Lo ke izo konoser a Claude Lanzmann en el mundo entero es su filmo Shoah, ke kedara por syempre komo un monumento. Ama este ombre izo munchas otras kozas i por esto todo uvyera meresido una emisyon entera, si no aviyamos pedrido, komo vos dishe, dos otros djudyos de los kualos tendré tambyen de avlarvos oy.
Claude Lanzmann nasyo el 27 de novyembre 1925 en Bois-Colombes, una sivdadika serka de Paris, de Armand Lanzmann, el mismo nasido en Fransya de paryentes venidos, eyos, de Byelorusiya i de Lettoniya, i de su mujer Pauline, dicha Paulette Grobermann, nasida en el vapor entre Odessa i Marsilya, de Yankel i Perl Grobermann, orijinaryos de Bessarabiya.
Asigun Claude Lanzmann, ke konto su vida en un livro eskrito en 2009, intitolado “Le lièvre de Patagonie” (el lievre de Patagoniya), fue edukado “sin la solombra de la solombra de la mas chika edukasyon djudiya ke sea, ni relijyoza, ni kulturala”.
No kale enkantarse de esto: munchos djudyos venidos de la Evropa del este keriyan, komo se dize, aboltar la pajina en un mundo muevo, la Fransya, i olvidar djudaismo i djuderiya ke les aviya tan kostado. Por esta djente, la idea de Jean-Paul Sartre, eksprimida en 1946 en su livro Réflexions sur la question juive (penseryos sovre la kuestyon djudiya) i asigun la kuala son los antisemites ke ambezan al djudyo ke es djudyo, es una idea djusta. Es falsa, Sartre lo rekonose el mismo, para los djudyos relijyozos o syonistos, ke no tyenen menester de antisemites para saver ke son djudyos, ama para la djente komo el chiko Claude Lanzmann, es una idea djusta i esto va puede ser djugar un rolo importante kuando Lanzmann va konoser a Sartre.
Ama dainda no estamos en esto. El chiko Lanzmann se va al liseo Condorcet (el mismo ke el ande me fui despues de la gerra) i deskuvre kon espanto komo se aze aharvar por antisemites un povereto djudyo ruvyo de su klasa. Esto se pasava antes de la gerra, ama si puedo avlarvos de mi vos diré ke yo mismo despues de la gerra en este mismo liseo, me tuve ovligado de luchar kontra los antisemites.
Kuando vyene la gerra en 1939, el padre de Lanzmann, ke entremyentres a divorsyado, toma sus tres kriaturas (Claude tyene 14 anyos) i los yeva kon el en Brioude, chika sivdadika en medyo de la Fransya, ande lo embiyo la Armada franseza. I kuando ayegan los Almanes en 1940, el padre ambeza a sus kriaturas a eskonderse i eskabuirse si vyenen los almanes o la polisiya franseza para aferrarlos.
En 1944, a los 18, Claude entra en las Mansevezes Komunistas (i eskondidas) i en mismo tyempo en la Rezistensya. Aze parte de los kombates de los Rezistantes kontra los Almanes, sovre todo kuando kale impedirles de ir a kombatir en Normandiya kuando desbarkaron los Alyados.
Despues de la Liberasyon, Claude abolta en Paris ande esta su madre kon su muevo kompanyero Monny de Boully, poeta surrealisto djudyo de orijen serba, kon kyen aviya sido aferrada por la Gestapo, ama salvados los dos (no se komo) grasyas al poeta Jean Rousselot.
Claude kontinua sus estudyos de literatura, i ansina se aze amigo kon Jean Cau, ke mas tadre le va azer konoser a Jean-Paul Sartre i su kompanyera Simone de Beauvoir.
En 1947, se va en Almanya para estudyar la filozofiya. Melda los Penseryos de Sartre sovre la kuestyon djudiya, i entyende enfin komo se aze ke es djudyo sin serlo.
En 1949, Lanzmann eskrive un reportaj sovre la Almanya del este ke plaze a Sartre, ke le demanda de entrar en su revista Les Temps Modernes (los tyempos modernos).
En poko tyempo, Lanzmann se aze amigo de Sartre, i amante de su kompanyera Simone de Beauvoir. Kale saver ke si Simone de Beauvoir fue kaji vida entera la kompanyera de Sartre, nunka bivyeron en djuntos. A la kontra, Lanzmann sera el solo ombre kon kyen Beauvoir bivyo, afillu si, kuando se amaron, en 1952, el teniya 27 anyos, eya 44. En djuntos se van este mismo anyo 1952 en Israel, i Lanzmann kaye en amor a la vez por el pais i por su puevlo, el puevlo djudyo al kual pertenese. Nunka mas trokara. Vida entera va ser un defensor del Estado i del puevlo de Israel.
Lanzmann entra en el komité de redaksyon de la revista Les Temps Modernes, fundada en 1945 por Sartre i Beauvoir. A poko a poko va tomar importansya en esta revista, i despues de la muerte de Simone de Beauvoir en 1986, va ser el kapo de la revista.
Ama lo ke va azer konoser Lanzmann en el mundo entero no va ser su lavoro eskrito de gazetero, va ser su lavoro de gazetero a traves del sinema.
En 1972, Lanzmann se va en Israel para azer un filmo intitolado Pourquoi Israel? (deke Israel?) ande va i peshkuza a todo modo de djente en Israel.
I una vez aya, unos del governo israelyano le demandan de azer un filmo ke sea, no sovre la shoah, ama ke sea la shoah. Lanzmann no acheta pishin, andevinando ke si acheta, es su vida entera ke va toparse komida por la altura del lavoro ke le a sido demandado. Al kavo, despues de muncho pensar, Lanzmann acheta.
Acheta, ama no empesa el filmo. No lo kyere empesar si no se ambeza de antes, i por el klavo i el burako, todo lo ke ay de saver. Melda i melda, se va en todas las bibliotekas, los muzeos, melda, mira, se ambeza. I esto le toma anyos.
Despues, i solo despues, empesa su lavoro de sineasto i de gazetero. Ya tomo la desizyon de no azer un filmo amostrando las imajenes ke egzisten, i ke ya son terrivles, ma un filmo ke va avlar, mas ke de la vida terrivle de los kampos, va avlar de la muerte, organizada de manera industriyale. Komo la djente era matada? Lanzmann lo va demandar a los ke lo vyeron, los testigos, ama tambyen reushe de ver a los ke dyeron la muerte, i ke le kontan komo matavan. Sovre los sesh nazis peshkuzados, tres lo fueron savyendo ke eran filmados, tres sin saverlo. Va tambyen peshkuzar a las viktimas, i esto todo lo yeva de una parte del mundo a la otra, en 14 paizes diferentes, i le toma mas de diez anyos, kon mas de 250 oras de filmo. No se puede amostrar un filmo de 250 oras. El tyempo de un filmo es entre ora i medya i dos oras, tres kuando es muy muy largo. 250 oras? Kale kortar. El solo lavoro de kortar i aparejar el filmo le va tomar dos anyos. I al kavo de dodje anyos, el filmo sale en 1985: tura 9 oras i medyo.
Kualo dizir de este filmo sino ke es un monumento… una ovra sinematografika ke se asemeja a dinguna otra. Una ovra para la Istorya, ke devra kedar para syempre.
Kon lo ke korto, Lanzmann salyo a poko a poko otros filmos travados de las 250 oras ke vos avli:
– en 1997: Un vivant qui passe (un bivo ke pasa) : entrevista kon Maurice Rossel, de la Kruz Korolada, ke se fue en los kampos i no vido nada de espesyal
– en 2001: Sobibor, 14 octobre 1943, 16 heures : entrevista kon Yeuda Lerner sovre la rebuelta de los prezoneros, ke konti aki en mi emisyon del 18 fevrero 2016.
– en 2010: Le rapport Karski, entrevista kon Jan Karski, ke aprovo de akavidar a los kapos de governo, inkluendo Roosevelt, sovre lo ke se pasava en Polonya kon los djudyos, i ke sirvyo de nada.
– en 2013: Le dernier des injustes (el ultimo de los indjustos) una entrevista kon Benjamin Murmelstein, prezidente del Judenrat de Theresienstadt
– en 2018: Les quatre soeurs (las kuatro ermanas): lo ke kontan kuatro mujeres sovre las orrores de los kampos nazis.
A parte de estos todos filmos en relasyon kon la shoah, Lanzmann no se olvida su amor de Israel, i sale en 1994 el filmo Tsahal, ke tura mas de sinko oras.
Esto todo dicho, no puedo eskapar kon Claude Lanzmann sin avlar de su amor por las mujeres.
Ya avlimos de Simone de Beauvoir. Otro amor de su vida fue la aktrisa de sinema i teatro Judith Magre, kon la kuala fue kazado de 1963 a 1971. Este mismo anyo, 1971, se kazo kon la eskrivana almana Angelika Schrobsdorff, i en 1995, kon Dominique Petithory. Kon eya va tener un ijo, Felix, ke se va morir en 2017, a 23 anyos, del kanser.
Claude Lanzmann saviya ke el mismo era serka de la muerte, ama tan amava la vida ke aboressiya a la muerte, ke yene eskapo por tomarlo el 5 de este djulyo.
I kon el poko tyempo ke me keda vos kyero avlar agora de Moshe Mizrahi i de Uri Avnery. En mis montanyas ande me topava este mes de agosto, no me ambezi sus muerte, es mi amigo Jose Molho ke me las akavido.
Moshe Mizrahi nasyo el 5 de septyembre 1931 en Aleksandria, en el Ayifton del rey Fuad i de los inglezes. En 1946, en un tyempo ande la Palestina se topa tambyen basho los Inglezes, se va aya kon su madre (el tyene 15 anyos) i su chiko ermano, ke va ser despues matado el 13 de djulyo 1948, dos mezes despues la independensya, a la edad de 9 anyos, por un bombardamento ejipsyano.
De si para si, se ambeza el sinema i va azer en todo 16 filmos. El mas konosido va ser en 1977 La vie devant soi (la vida delantre de si), travado de un roman de Romain Gary, ke va obtener el Oscar del mijor filmo en lingua ajena, i Simone Signoret va obtener por su rolo en el filmo el Cesar (ekivalente franses del oscar amerikano) de la mijor aktrisa.
Ama sovre los 16, komo no nombrar La kaza de la kaye Chelouche (1973) i, asigun mi su mijor, Roza te kyero (1972).
A la kontra, su filmo de 1988 Mangeclous, travado del roman de Albert Cohen, no me plazyo, porke Moshe Mizrahi kijo tomar aktores fransezes ekselentes, komo Bernard Blier o Pierre Richard, ama ke no paresiyan djudyos. Lo izo maksus, kreo para amostrar el aspekto universal de la ovra de Cohen, ama asigun mi fue un yerro, porke ansina se pedriyo toda la savrozor de los personajes tan espesyales de Cohen.
Aki vamos a deshar Moshe Mizrahi, ke este en Gan Eden, para avlar de Uri Avnery.
Uri Avnery, i Abie Nathan, ke, el, muryo aze 10 anyos, fueron los dos kampeones los mas famozos de la paz kon los Palestinyanos.
Uri Avnery nasyo Helmut Ostermann en Almanya el 10 de septyembre 1923, i a la venida de Hitler, en 1933, su famiya tuvo el meoyo de fuir verso la Palestina kuando era dainda posivle. 5 anyos despues, a los solo 14 anyos, entra en el Irgun (Uri Avnery en el Irgun, koza ke nunka uvyera imajinado) para luchar kontra los inglezes, ama en 1941, kuando tyene solo 17 anyos, ya se va del movimyento, topandolo demaziya antiarabo.
Kuando vyene la gerra de Independensya, Uri kombate en la Brigada Givati, famoza basho el nombre de “rapozas de Shimshon”.
Despues de la gerra entra en la gazeta de syedra Haarets, ma, topando ke no es bastante libero de eskrivir lo ke kyere, sale de la gazeta despues de un anyo, para entrar en la gazeta Aolam Aze (este mundo).
En oktovre 1953, despues de tener kritikado la operasyon de Kibiya por la Unidad 101 (ke izo unos 70 muertos siviles ande los arabos), Avnery fue aharvado por algunos de esta unidad ke le rumpyeron los dos brasos, i tuvo de ir al oshpital.
I en 1955, la gazeta tuvo un atentado a la bomba despues de un artikolo de Avnery kontra el mayor de Haifa Abba Hushi.
Despues Avnery va ser deputado de 1965 asta 1973, i de 1979 asta 1981.
En 1982, durante la gerra del Levanon, se va ver a Yasser Arafat para diskutir komo eskapar esta gerra.
En 1993, funda el Gush Shalom, (el bloko de Paz) i va ver munchas vezes a Yasser Arafat, ke tyene en grande estima.
Asta su muerte, Avnery lucho para la paz kon los Palestinyanos, al punto ke se diziya post-syonisto. Esto dicho, meldi sovre internet un artikolo de una Palestinyana (Haidar Eid) sovre su muerte: es yena de odyo kontra Avnery, “djudyo ashkenaz blanko” (…) “ke nunka se arrepintyo del grande rovo de la Palestina en 1948”. Komo estash vyendo, dainda estamos leshos, malorozamente, de esta paz tan kerida por Avnery, ama ya vino el tyempo de eskapar esta emisyon.
No vos digo al djueves ke vyene, porke kon estas fyestas de Rosh Hashana tendré mis inyetizikos en kaza, i kuando los tengo, no kale ni pensar pueder lavorar ni aparejar kualkyera emisyon!
El djueves de despues, 20 de septyembre, tendré el grande plazer de arresivir a Evelyne Lagardet para su muevo roman La Maison Rozenbaum (la kaza Rozenbaum). La entrevista se tendra en franses, porke malorozamente, Evelyne Lagardet, ke teniya una madre de los muestros, ama un padre lehli, no save avlar muestra lingua.
Dunke al 20 de septyembre, si kyere el Dyo!
Edmond Cohen
Paris, Fransya
Paris, Fransya
[Orijen: www.esefarad.com]
Sem comentários:
Enviar um comentário