Yannig Baron: una vida per Bretanha

Ven de sortir sa biografia e a chasque còp qu’anóncia una novèla chauma de la fam, las personas visadas se dison: “Macarèl, Baron torna al combat!”

Ecrich per Fabien Lecuyer

Yannig Baron es un exemple. Per los bretons de segur mas tanben per vosautres amics occitans. Yannig Baron nasquèt sus l’illa de Groez dins una gròssa familha de marins. Gròssa e paura. Es enqüera un dròlle quand embarca per lo primèir còp sus un “dundee” per una campanha de pescha.

 

Mas un jorn Yannig Baron descobriguèt qu’el èra breton. E que Bretanha èra una nacion. D’aquel jorn enlai, trobèt son chamin de vida: Bretanha. Desenant viurà per lo país. Pasmens, aqueste engatjament començarà concretament en Occitània. A Tolon precisament, e puei a Marselha. Es en Occitànià que fondarà sas prumèiras associacions bretonas, per exemple.

 

Quand tornarà al país, s’engatjarà d’a fons per la pàtria e la lenga bretonas. Fondarà lo centre cultural Menez Kamm, la filièra bilingüa dins las escòlas catolicas (lo 40% de las escòlas en Bretanha), lo centre de formacion Stumdi per aprene lo breton en sièis mes, lutarà contra lo Menhirland de Karnag, etc. D’annadas puei, s’engatjarà per lo galò tanben en lançant de cors per la mainada d’escòlas catolicas.

 

Catolic per çò que Yannig Baron es catolic. Catolic d’esquèrra. Quand lo papa Joan Pau II vendrà dins l’estat francés en 1996, Yannig Baron lo farà venir en Bretanha tanben. A Santez-Anna Gwened ont Yves Nikolazig ausiguèt Anna, la grandmaire del Crist, li parlar en breton (de Gwened!)

 

Coma lo Crist, Yannig Baron se servís de son còrs per evangelizar lo mond a l’evangèli de “l’Emsav”, lo movement bretonista. Mai d’un còp farà de chaumas de la fam per desvelhar las consciéncias. E ganharà a chasque còp. Los bretons an l’instint del tragic e un certan misticisme.

 

Anuei, Yannig Baron a 82 ans. S’ocupa de la còla de reflexion “Breizh Impacte”. Ven de sortir sa biografia e a chasque còp qu’anóncia una novèla chauma de la fam, las personas visadas se dison: “Macarèl, Baron torna al combat!”.

 

 

 

---

GUYNOVARC’H, Christian. Yannig Baron, ar seizh avel - par tous les vents de Bretagne. Le Temps Éditeur. Mai de 2018.

[Poblejat dins www.jornalet.com]