Al Baucet, de toristas arròsan los arbres e demandan al cònsol màger cossí se desbarrassar de las cigalas
 |
| www.ville-lebeausset.fr |
Lo cant de las cigalas es un son fòrça caracteristic de l’estiu en Occitània mediterranèa. Mas i a de toristas que vòlon passar lors vacanças al país sens las ausir. Es lo cas del Baucet (Tolonenc) ont lo cònsol màger del vilatge a recebut de planhs de certans toristas qu’an entraïnat de situacions que nos poirián semblar ridiculas mas de còps arriban a la violéncia contra l’environament, contra lo país.
Georges Ferrero, consol màger del Baucet, explica a France Bleu que de toristas que se planhián del cant de las cigalas arrosèron los arbres per las far calar. E quitament contèstan l’apelacion “cant de la cigala” car segon los toristas fan “crac-crac-crac... aquò n’a pas res a veire amb un cant”.
Per l’elegit provençal, es “una situacion desolanta”. “Siáu estat ben acipat. Lei cigalas fan partida d’un emblèma de Provença. Quand venon dins lo sud [vòl dire al país], sabon que i a de cigalas. Siam fièrs de leis aver”.
E mai Ferrero explica qu’el foguèt abordat dos còps per de toristas que volián eliminar las cigalas. “Me demandèron s’aviáu de produchs insecticidas per passar sus lei arbres, coma se desbarrassar dei cigalas”.
Tanben los cloquièrs
Es pas lo primièr còp que los toristas que van en vacanças dins la campanha d’Occitània se planhon de cèrtas “incomoditats” que i son pas abituats. Entre d’autres, ongan podèm pereu soslinhar lo cas dels toristas qu’an demandat de descalar la sonada del cloquièr dels Bondons (Cevena Gavaudanesa) per èsser pas desvelhats a 7 oras del matin, segon Midi Libre.
Una trolada
La còla de L'Impro'Vence revendica qu'aquela informacion es falsa. Lo sit de tròls e infos improbablas se vanta d'aver fach passar aquela informacion sus France Bleu, Le Point e La Provence. Sembla que tanben Jornalet es estat victima d'aquela trolada.
[Poblejat dins www.jornalet.com]
Sem comentários:
Enviar um comentário