An lançat una campanha de micromecenatge per finançar una television en linha en lenga cornica

Los impulsors demandan 6000 liuras per produire de programas de biais regular

I a pas cap de cadena de television en cornic qu’emeta regularament, aquò es un void que la Comunautat de la Lenga Cornica, o Kowethas an Yeth Kernewek, vòl ensajar d’emplir. Amb aquela tòca, lo collectiu a lançat una campanha de micromecenatge per finançar una television “en linha e duradissa”, e ne demandan 6000 liuras esterlinas.

 
La basa d’aquela television existís ja: es Pellwolok an Gernewegva, un servici benevòl que compren qualques programas disponibles sus YouTube. Mas li manca de ressorsas essencialas e minimalas, coma dispausar d’un pichon estúdio per poder produire de programas de biais regular e per poder formar los benevòls en contenguts audiovisuals.
 
Los impulsors de la campanha considèran que dispausar de contenguts audiovisuals es fondamental per garentir la subrevivença d’aquela lenga celtica, parlada en Cornoalha (extrèm sud-oèst del Reialme Unit) per mièg milièr de personas e que viu un procès de reviscolament après èsser demorada practicament escantida. 

[Poblejat dins www.jornalet.com]