quinta-feira, 14 de junho de 2018

L’ÒNU condemna la pena de cinc ans de preson impausada per China a un activista pròdreches lingüistics dels tibetans


Tashi Wangchuk a recebut la senténcia d’“incitacion al separatisme” per aver criticat la manca d’educacion disponibla en tibetan dins las escòlas
 

Sièis expèrts del Conselh dels Dreches Umans de las Nacions Unidas an condemnat la pena de cinc ans de preson qu'un tribunal chinés prononcièt lo 22 de mai contra Tashi Wangchuk, un botiguièr e activista qu'en 2015 apareguèt dins un documentari de The New York Times ont reclamava que se respectèsson los dreches lingüistics dels tibetans. Tashi i denonciava qu'èra impossible de trobar una escòla bilingua en tibetan e chinés a Yushu, la vila ont viviá.
 
Per aqueles faches, la polícia chinesa lo detenguèt en genièr de 2016, e coma ne parlàvem en abril passat, passèt longtemps en preson a l’espèra del verdicte. En fin finala, lo 22 de mai, lo tribunal de Yushu lo considerèt colpable “d’incitacion al separatisme” e lo mantendrà embarrat fins a l'an 2021.
 
Los expèrts de l’ÒNU considèran que la China a violat e reprimit lo drech de Tashi a “exprimir liurament son opinion suls dreches umans de la minoritat tibetana”, e denóncian que lo govèrn chinés a quitament refusat de lor donar d’informacion sus “las mesuras concretas presas per promòure e protegir los dreches lingüistics e culturals” del pòble tibetan. 


[Imatge: feetibet.org - poblejat dins www.jornalet.com]

Nenhum comentário:

Postar um comentário