Carles Puigdemont i declarèt que tornariá en Catalonha coma president elegit per un parlament en cas que i aguèsse las garentidas necessàrias
Lo Comitat de Defensa de la Republica (CDR) de Montpelhièr organizèt dimars passat una serada-debat sus la question catalana en preséncia de Mireia Boya, èx-deputada occitana al Parlament de Catalonha (CUP); Dàvid Grosclaude, representant del Partit Occitan; Anna Surra, deputada (ÈRC) al Congrès espanhòl, Laura Borràs (JuntsxCat) e lo president de la Generalitat de Catalonha en exili, Carles Puigdemont, que participèt en videoconferéncia.
“Questions, debat dab la sala e informacions per essajar de har contrapés a la manca d’informacion qui patim en los mèdias francés”, çò rapòrta Grosclaude. De soslinhar que mai de dos cents personas comolavan la sala Guilhèm de Nogaret, segon France 3.
Puigdemont tornarà en Catalonha coma president
Es justament durant aquel eveniment que Puigdemont anoncièt son retorn a Catalonha. Lo president de la Generalitat en exili diguèt qu’a l’ora d’ara èra pas possible de tornar en Catalonha perque i aviá una menaça sus son investidura: un òrdre d’arrestacion emés per l’estat espanhòl. “Vòli tornar a Catalonha, amb de garentidas e tota la legitimitat, coma president elegit per un parlament qu’es lo resultat dirècte de la volontat dels ciutadans”, çò diguèt als montpelhierencs.
L’endeman s’anonciava l’acòrdi entre las doas principalas formacions independentistas del Parlament de Catalonha elegit en decembre passat. Junts per Catalunya (Amassa per Catalonha) e Esquèrra Republicana de Catalonha son arribats de pachar que cal investir tornarmai Puigdemont coma president de la Generalitat. Per ara sabèm pas se Puigdemont farà son discors d’investidura telematicament o s’un autre deputat lo legirà en son nom.
De son costat, la CUP celèbra l’acòrdi e “los quatre deputats empediràn pas l’investidura d’un govèrn republican”, e mai demanden que i aja quicòm de concret sul biais de desvolopar la Republica.
Sem comentários:
Enviar um comentário