La jutgèssa qu’emetèt lo mandat d’arrèst internacional marquèt l’opcion de “corrupcion”, car las opcions de “sedicion” e “rebellion” èran pas dins lo formulari per l’extradicion exprèssa
La jutgessa de la cort espanhòla que mandèt encarcerar los presidents de las associacions independentistas e los ministres del govèrn de la Generalitat Catalonha, ensagèt de convéncer la justícia bèlga que lo president Carles Puigdemont e sos ministres èran “corromputs”. Emetèt un mandat d’arrèst internacional per que la justícia bèlga liurèsse los elegits catalans, e sul formulari marquèt l’opcion de “corrupcion”, çò rapòrta El Diario.es.
L’extradicion que la demanda la justícia espanhòla se resòlv d’un biais immediat se los delictes que se reclama son incluses dins una lista qu’a una trentena de categorias, mas qu’inclutz pas la “sedicion” ni la “rebellion”. Per aquela rason, e per obténer una extradicion immediata, la jutgessa auriá indicat la “corrupcion”.
Se las autoritats bèlgas aguèsson estimat aquel delicte, Puigdemont e sos quatre conselhièrs serián estats liurats sul pic. Mas al contrari, la justícia bèlga a decidit d’estudiar l’afar al detalh.
D’efièch, lo 5 de novembre passat la justícia bèlga entendèt Puigdemont e sos conselhièrs. Eles se deuràn tornar presentar deman, 17 de novembre, davant lo jutge qu’aurà estudiat l’afar e deurà determinar s’es justificada l’extradicion demandada per Espanha.
Segon Paul Bekaert, l’avocat flamenc en dreches umans que defend lo president Puigdemont, se depausarà un recors contra tota sollicitacion d’extradicion car las penas de preson que la demanda la justícia espanhòla son desproporcionadas e los elegits catalans riscan de patir un tractament inuman e degradant en cas que sián empresonats dins l’estat espanhòl.
[Imatge: El Diario.es - poblejat dins www.jornalet.com]
Sem comentários:
Enviar um comentário