Referendum d’independéncia de Catalonha e Aran: lo bulletin de vòte, lo sit web e totas las informacions son tanben en occitan

Tot es publicat dins las tres lengas oficialas, e doncas tanben en lenga nòstra

Après una sesilha parlamentària maratoniana que permetèt d’aprovar una lei per organizar un referendum d’independéncia, lo govèrn de la Generalitat de Catalonha signèt dimècres a 22h30 lo decret de convocacion del vòte. Puèi s’es publicat cossí serà lo bulletin de vòte, un sit web informatiu e una seguida d’informacions. Tot apareis dins las tres lengas oficialas, e doncas tanben en occitan. Dins aquel sit web, referendum.cat, se tròba tanben la possibilitat de s’inscriure coma volontari per collaborar amb los prètzfaches del referendum.

 

La campanha electorala durarà 15 jorns, del 15 de setembre a mièjanuèch fins al 29 de setembre. Lo disabte 30 de setembre serà consagrat a la jornada de reflexion e lo 1r d’octòbre se poirà votar dins los burèus que lo govèrn de la Generalitat aurà meses en plaça.

 

Lo bulletin de vòte, que serà tanben en occitan, pausa la question “Voletz que Catalonha vengue un estat independent en forma de republica?”, e las opcions de responsa son “òc” e “non”.

 
 
 



[Poblejat dins www.jornalet.com]