sábado, 12 de agosto de 2017

Los djudyos de Arjentina


Por Haim Vidal Sephiha 
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke agora Radio J tyene un sityo internet. Agora mis emisyones se pueden oir en el mundo entero indose sovre Radio J kon internet ( http://www.radioj.fr/node/145) sea en direkto, sea kuando se kyere: mis emisyones (kuando el tekniko lo kyere byen) son enrejistradas a mi nombre.
Vos akodro tambyen ke el proksimo atelye de konversasyon de la asosyasyon Vidas Largas se tendra el lunes 2 de marso de las tres a las sinko en el Centre Communautaire en Paris.
Antes de empesar mi emisyon, tengo un anunsyo de azer:
Muestra amiga Angèle Saül i su sovrina Muriel Flicoteaux estan lavorando sovre la istorya de los djudyos de Champigny sur Marne, ke fueran sefaradim komo ashkenazim, i por esto bushkan testimonyos de djente ke pueda kontar lo ke fueron la vida i malorozamente tambyen la muerte de los ke konosyeron ke biviyan en esta sivdadika serka de Paris, antes, durante komo despues de la gerra. Los testigos pueden eskrivir a Angele al adereso angelesaul49@gmail.com
Esto dicho, oy pensi de avlarvos de los djudyos de Arjentina, de los kuales ya dishe aki unas kuantas kozas, la primera vez avlandovos del atentado de la AMIA ke izo 85 muertos, i agora puede ser uno mas kon la muerte de Nisman, en mi emisyon del 8 de septyembre 2011 sovre el terrorismo kontra djudyos, i la sigunda vez kuando vos avli de los gauchos djudyos en mi emisyon del 10 de oktovre 2013.
Ama oy kyero avlar mas en jeneral, i en una emisyon entera, de los djudyos de Arjentina i de sus istorya.
Kale saver ke los djudyos de Arjentina son entre 150.000 i 250.000, vamos a dizir unos 200.000, lo ke aze de esta komunidad la mas grande de Amerika latina, la tresera en el kontinente (despues los Estados Unidos i el Canada) i la setena del mundo afuera de Israel (asigun Wikipedia).
Parese ke esta komunidad empeso en 1619 kon la yegada en Buenos Aires de ocho naves mon munchos djudyos vinyendo de Lisboa i Lima. Ama se asimilaron a la povlasyon lokala por kazamyentos i dezaparesyeron en tanto ke djudyos.
Es solo en el siglo 19 ke empesa por vedra la instalasyon de djudyos en Arjentina. Kale saver ke la Arjentina obtuvo (por fuersa) su independensya de la Espanya solo en 1810, i ke antes, asigun el edikto de 1492, era proibido la yegada de kualkyer djudyo en tyerra espanyola, ke sea en Espanya misma o en sus koloniyas. En kuanto a los kripto-djudyos basho la aparensya de katolikos, fueron aya komo en toda Espanya persegidos por la Inkizisyon, torturadios i kemados.
Afillu si la Inkizisyon fue baldada en 1813, dainda no vyenen los djudyos. Solo unos muy pokos Almanes ayegan en 1846, i en 1853 van a formar una chika komunidad (no mas de syen djudyos) en Buenos-Aires. En 1862, antes de Pesah, diez ombres se aunen para orar, i ansina empesa la primera Congregasyon israelita de Buenos-Aires, kon un syerto Segismundo Aguerbag komo prezidente.
El 19 de oktovre 1876 es votada en Arjentina una ley dicha sovre la immigrasyon i la kolonizasyon. Es esta ley avriendo las fronteras a todos ke va interesar a los desmazalados djudyos de Rusia, sufriendo de terrivles pogromes (1859 en Odessa, 1862 en Akkerman, 1871 en Odessa de muevo, 1880, 1882, i enkorajados por el Tsar el mismo).
Carlos Calvo, kargado de la immigarsyon en Arjentina, pasando por Paris, enkoraja a los djudyos de immigrar en Arjentina. Unos kuantos lo van a azer, ama las kondisyones son muy duras, los poveretos immigrantes se mueren de frio i ambre.
Aki vos vo meldar lo ke vos dishe en mi emisyon del 10 de oktovre 2013:
Kale saver ke, syendo los terrivles pogromes de Evropa del este al kavo del siglo 19, munchos djudyos rusos se fuyeron, i syertos aprovecharon ke el Estado de Arjentina, dirijido por Nicolas Avellaneda, en esta misma epoka, tomo el 19 de oktovre 1876 una ley “sovre la immigrasyon i la kolonizasyon”, avriyendo las puertas del pais a los ke keriyan venir.
En vedra, asigun lo ke meldi sovre Wikipedia, los djudyos de Podolia i de Bessarabia no teniyan idea de irsen en Arjentina. Sus idea era de ir en Palestina, i por esto, pensaron demandar ayudo al baron Edmond de Rothschild, famozo syonisto (afillu si el nombre no egzistiya dainda) ke biviya en Paris. Dunke se meten d’akodro para embiyar en Paris a un syerto Eliezer Hauffmann para ver a este Rothschild. Ama Hauffmann no reushe en su misyon, syendo ke parese ke Rothschild ni mismo lo resivyo, no se save deke.
Kualo azer? Hauffmann se ambeza ke ay una posibilidad de ir en Arjentina. Se ambeza ke un syerto Rafael Hernandez vende tyerras ke le pertenesen i ke se topan en Nueva Plata, en la provinsya de Buenos Aires. Un kontrato es firmado por Hauffmann, reprezentando los djudyos; i, en agosto 1889, 130 famiyas toman el vapor Weser, i en vez de ir en Palestina, se van en Arjentina, i ayegan el 14 de agosto en Buenos Aires. Aya aparese ke todo lo ke disho i aprometyo Hernandez era falso. No ay las tyerras merkadas a Hernandez. Los djudyos se van a ver a un avokato, Pedro Palacios, i el, tenyendo una grande tyerra en la provinsya de Santa Fe, les vende un pedaso. Los djudyos firman un muevo kontrato, i de muevo se azen enganyar: nada de lo ke a sido aprometido en el kontrato – animales , instrumentos, ets – les es remetido. Se topan en una situasyon trajika. No tyenen nada de komer; 64 kriaturas mueren i son enterados aya. 
La koza se save, i el governo arjentino yama a un mediko de Roumaniya, el doktor Wilhelm Loewenthal, ke se topa en Paris, para ver lo ke se puede azer para kurarlos. Loewenthal se va en Arjentina, se da kuenta de lo ke se pasa, i abolta en Paris para fundar una asosyasyon, la Jewish Colonisation Association (JCA). Esta asosyasyon es fundada en 1891 en Londres i es el baron Maurice de Hirsch, rikinyon bankero djudyo de Almanya, ke va dar las paras i okuparse de salvar a los djudyos de Rusiya. Komo a pedrido su ijo Lucien aze todo en nombre de su ijo muerto Lucien de Hirsch.
La asosyasyon va dar a kada famiya una asyenda de 50 a 100 ektaros por el presyo de 2.000 dolares por famiya. Los djudyos yaman a la sivdad Kiryath Moshe, en onor de Maurice (Moshe) de Hirsh, ama va ser enrejistrada komo Moises Ville.
Despues de esta sivdadika, otras van a ser fraguadas. 42 famiyas ayegan vinyendo de Grodno (oy en Byelorusiya). Se meten en kyoyes ke yaman asigun ay moradas: Las kuatro kazas, las sesh kazas, las dodje kazas, las ventikuatro kazas.
Despues vyenen tres grupos de 104 famiyas en todo en los kazales de Wavelberg al norte de Moises Ville, Virginia al este i Juanita al oeste. En 1901, otro grupo de 31 famiyas venidas de Byalistok (oy en Polonya) kon el eskrivano yidisch Gedaliah Bublick se instala en el kazal de Zadok Kahn, ansina yamado en onor del haham bashi de Fransya.
Kon los terrivles pogromes de Kichenev, otros vyenen de Bessarabia en 1903, i se instalan en Mutchnik i otros en Monigotes en 1905. Antes de la Gerra son los refujyados almanes ke vyenen en el sektor de Capivara, i tambyen despues de la gerra.
Son estos kazalinos ke fueron yamados los gauchos djudyos por Alberto Gerchunoff en un livro ke eskrivyo en 1910.
En los anyos 1940, el numero de djudyos en Moises Ville i los kazales al rededor aserka los 5.000, sea 90% de la povlasyon total.
Ama despues, a poko a poko, los djudyos se van a ir sea en Israel sea en las grandes sivdades, i en 2001 eran solo 12% de la povlasyon tota. En 2005, por la primera vez, el mayor de Moises Ville no es mas djudyo.
I agora vos kyero meldar las palavras de una kantika eskrita por Jevel Katz, ke se muryo en 1940:
In Mozesvil, mayn kleyn shtetele,
Mozesvil, mayn sheyn heymele,
Bist a yidishe medine,
Bist a shtolts far Argentine,
Mozesvil
Moises Ville, mi chiko kazaliko,
Moises Ville, mi ermozo ogariko,
Sos un estado djudyo,
Sos un orguyo para Arjentina,
Moises Ville.
Ansina s’eskapa lo ke vos kontava en 2013 sovre los gauchos djudyos.
Ama a parte de estos gauchos, la istorya se kontinuo. Los djudyos de Evropa no kedaron de ayegar en Arjentina, al punto ke se toparon ser unos 150.000 en los anyos 1920.
Entre eyos, kale nombrar a Joseph Kessel, nasido en Claraville (Arjentina) en 1898, el gazetero i eskrivano franses al kyen devemos muncho mas despues, durante la sigunda gerra, las palavras del Kante de los Partezanos fransezes, eskritas kon su sovrino Maurice Druon. El padre de Joseph, Samuel Kessel, era un mediko djudyo litvak venido en Arjentina para lavorar. Poko tyempo despues, entre 1905 i 1908, aboltaron en Rusiya, i despues vinyeron instalarse en Fransya, ama esto es una otra istorya.
Es en 1897, dunke un anyo antes del nasimyento de Joseph Kessel, ke se fraguo en Buenos Aires el primer kal, el Templo Libertad.
Ama no kale kreer ke todo se paso syempre kolay para los djudyos de Arjentina. Ya en 1889 kuando el vapor Webster ayego en Arjentina, el direktor de imigrasyones permityo a los non djudyos de dezembarkar, ama impedyo a los djudyos de dezembarkar, i es solo despues de dos diyas de diskusyones i el empushamyento de los gazeteros ke al kavo los djudyos pudyeron entrar.
En janvier 1919, uvo en Buenos Aires, asigun Wikipedia, pogromes fomentados por la polisiya.
I malorozamente, despues de 1933, kuando uvo una mueva ola de immigrasyon de djudyos fuyendo Hitler, en Arjentina la politika fue de impedir a los poveretos djudyos almanes de entrar en Arjentina, kuando teniyan lo mas menester. En 1938, el govyerno dyo instruksyones a los konsules de Evropa de refuzar vizas a los ke keriyan fuir. No es empleado el byervo djudyo. Mas ipokritamente se avla de “toda persona que fundadamente se considere que abandona o ha abandonado su pais de origen como indeseable o expulsado, cualquiera que sea el motivo de su expulsion”. Estas instruksyones eran sekretas i lo kedaron durante 60 anyos, asta ke fueron deskuvyertas en 1998 por la investigadora Beatriz Gurevich en un kashon en la embashada de Arjentina en Stockholm. Todo no se puede syempre eskonder: kuando se bushka, se topa…
Es vedra ke esta politika de serradura de las fronteras a los djudyos menasados de muerte no fue solo la de Arjentina. Fue malorozamente la de kaji todos los paizes del mundo, lo ke asigun mi es la mijor justifikasyon del syonismo, fundado sovre la nesesidad de un estado djudyo, ke, el, avre sus fronteras a los djudyos persegidos en el mundo, komo lo vimos despues de la gerra para los djudyos persegidos o echados de los paizes arabos, de Rusiya, de Etyopiya, ets.
Esto dicho, i afillu lo ke vengo de dizir, la Arjentina fue, asigun Wikipedia, el pais latinoamerikano ke tuvo lo mas de refujyados djudyos entre 1933 i 1945. Desde 1928 el pais resivyo, asigun Wikipedia, alrededor de 45.000 djudyos evropeos, la mitad entrada de manera ilegal.
Despues de la gerra, los djudyos de Arjentina tuvyeron de soportar a un Juan Peron ke desho entrar i dyo refujyo a un alay de nazis de alto nivel, el mas kriminal de todos syendo Adolf Eichmann.
Komo era imposivle de kastigar a este kriminal eskondido en Arjentina, el govyerno de Israel tuvo de toparlo i aferrarlo en mayo 1960 para yevarlo por fuersa i a eskondidas en Israel ande fue djusgado, kondenado i enforkado en mayo 1962. Si no me yerro, es la unika vez ke la pena de muerte fue aplikada en Israel.
Los nazis de Arjentina fueron muy arravyados i en junyo 1962, tres semanas despues de la muerte de Eichmann, una estudyante djudiya de 19 anyos, Graciela Sirota, fue aferrada i torturada, kemada kon sigaros.
Ama es en 1994, el 18 de djulyo, ke uvo el atentado antisemit el mas terrivle, kontra el han de la AMIA (Asosyasyon Mutual Israelita Arjentina) ande uvo  85 matados i mas de 300 feridos. Ya vos avli aki de este atentado.
Nunka los autores de este atentado fueron topados i djusgados. Ama este echo tuvo una kontinuasyon kon la muerte del prokurador arjentino Alberto Nisman, topado en su banyo kon un kurshum en la kavesa. Esto afito el alhad 18 del mes de janvier pasado , djusto el diya antes ke prezente delantre el Parlamento arjentino un raporto sovre el atentado kontra la AMIA. En este raporto, Nisman akuzava la senyora Kirshner, prezidente de Arjentina, de tener achetado de deshar el echo de la AMIA en kambyo de kontratos komersyales kon el Iran.
A la ora ande vos avlo, no se save dainda lo ke va salir de este echo Nisman, ke vyene komplikar el echo de la AMIA.
Agora desharemos los antisemites. No se puede avlar de Arjentina sin avlar de tango. I kale saver ke los djudyos djugaron un rolo en esta muzika, sea komo muzikantes famozos (komo, por egzemplo, Mario Abramovich, ke vyene de morir a fin 2014. Djugava violon en el Sexteto Mayor, el mas famozo orkestra de tango en el mundo) sea mismo komo muzikantes azyendo una muzika mas espesifikamente djudiya, komo Norberto Vogel i Victor Murstein, ke krearon el “klezmer tango”.
Agora la komunidad djudiya de Arjentina es numeroza i fuerte malgrado los antisemites. Es klaro ke la mayoriya de los djudyos de Arjentina son ashkenazim, ama por siguro vos tengo de avlar de los sefaradim de Arjentina, akodrandovos ke ay un atadijo entre los ashkenazim i los sefaradim de Arjentina grasyas a una mujer lehliya de orijen franseza, Hélène Gutkowski, nasida en Fransya en 1940, salvada de los Almanes por djustos ke la eskondyeron, i ke agora es profesora de sosyolojiya en la Universidad en Arjentina ande bive agora. El atadijo kon los sefaradim es su livro Erase una vez Sefarad i tambyen su grande amistad kon el profesor Haïm Vidal Sephiha.
Por lo ke es de los sefaradim de Arjentina, komo desharvos sin avlar, afillu si ya lo ize en otras emisyones, del CIDICSEF de una parte, i de eSefarad de otra parte?
El Cidicsef (Centro de Investigasyon i de Difusion de la Cultura Sefaradi) fue en 1975 una creasyon de la Fererasyon Sefaradi latinoamerikana.
Este centro es muy importante para la kultura sefaradi. Aya topamos, entre otras i otros, Hélène Gutkowski, ama tambyen Graciela Tevah de Ryba o Marcelo Benveniste. Yo los konosi por las emisyones de radyo ke pude oir de Fransya grasyas a Radio Sefarad de Espanya…
En kuanto a Marcelo Benveniste i su mujer Liliana, no puedo desharvos sin akodrarvos esta maraviya ke es eSefarad, gazeta internet ande se topa no solo lo ke se pasa kon los sefaradim en Arjentina, ama lo ke se pasa en el mundo entero (inkluyendo mis propyas emisyones…)
Ama ya vino la ora de eskapar mi emisyon, i vos digo, no al djueves ke vyene porke la radyo va tener menester de mi tyempo , ama al djueves de despues 19 de fevrero, si kyere el Dyo!



[Orijen: www.diariojudio.com]

Nenhum comentário:

Postar um comentário