segunda-feira, 24 de julho de 2017

Las identitats e solidaritats perdudas d’un caire e l’autre dels Pirenèus

Viure coma bons vesins es un libre de Patrici Pojada qu’analisa la coexisténcia dels pòbles frontalièrs qu’an partejat solidaritat, convivéncia, patz, e culturas

Se los Pirenèus son una barralha entre culturas diferentas o ben un luòc de contactes, d’amassada e d’escambis entre pòbles que partejan fòrça semblanças? La responsa l’auretz dins lo darrièr ensag de Patrici Pojada Viure com a bons veïns. Lo libre, que, o auretz comprés, significa en occitan "Viure coma bons vesins", es escrich en catalan, dins una pròsa que tot occitanofòn poirà comprene sens dificultat. Precisament la lenga es lo ponch de partença d’aquela òbra que demòstra los ligams entre los pòbles d’un costat e l’autre de la frontièra.
 
Una de las caracteristicas de las populacions frontalièras es que pendent los periòdes de guèrra entre los dos estats separats per aquela linha politica, an cercat mai que jamai la patz e la convivéncia. Una patz necessària per viure e practicar las activitats economicas pirenencas, coma l’elevatge o lo comèrci.
 
Ça que la, delà las “patzerias” e las semblanças culturalas e lingüisticas entre los pòbles transfrontalièrs, i a agut de fenomèns exteriors qu’an fach nàisser d’identitats desparièras al benefici dels dos grands estats, lo francés e l’espanhòl, e ansin la frontièra es venguda de mai en mai presenta, non solament coma realitat fisica e politica, mas tamben mentala e simbolica.
 
Patrici Pojada es un cercaire istorian e lingüista, originari del País de Fois. Es actualament professor d'istòria modèrna a l'Universitat de Perpinhan, membre del Conselh Lingüistic del Congrès Permanent de la Lenga Occitana, de l'Institut d'Estudis Araneses-Acadèmia Aranesa de la Lenga Occitana e foguèt tanben president del Grop de Lingüistica Occitana.
 
 
 


POJADA, Patrici. Viure com a bons veïns. Identitats i solidaritats als Pirineus (segles XVI-XIX)Editorial Afers, 2017. 296 paginas. 19 èuros.


[Imatge: Vicent Olmos - poblejat dins www.jornalet.com]

Nenhum comentário:

Postar um comentário