An depausat 51 207 signaturas per la reünificacion de Bretanha

L’objectiu es d’amassar 100 000 signaturas e de far conéisser al nòu govèrn la revendicacion bretona

Escrich per Fabien Lécuyer 

Lo divendres passat èran una desena de militants bretons a manifestar davant la sosprefectura de Saint-Nazere dins lo departament de Léger Atlantic. Foguèt l’escasença de depausar al sosprefècte 51 207 signaturas per reclamar la reünificacion de Bretanha, valent a dire lo retorn de Léger Atlantic dins la “region” Bretanha amb los autres quatre departaments.

 

L’objectiu de “Bretagne Réunie” (Bretanha Reünida), l’associacion istorica que coordena la lucha per la reünificacion, es d’amassar 100 000 signaturas e, aital, de far conéisser al nòu govèrn aquela problematica.

 

Lo departament de Léger Atlantic foguèt separat dels autres quatre departaments bretons pel regim de Philippe Pétain. En 1982, lo govern socialista tornèt prene aquela meteissa carta. Es en aquela epòca que foguèt creada la region artificiala de “País de Léger”. Dempuèi aquel moment la reünificacion es un combat màger pels bretons.

 

 

 

[Poblejat dins www.jornalet.com]