quinta-feira, 15 de junho de 2017

La Cort Europèa dels Dreches Umans condemna Espanha per aver jutjats inelegibles en 2003 lo burèu del Parlament del Bascoat

Juan María Atutxa, Kontxi Bilbao e Gorka Knörr refusèron de dissòlver lo grop parlamentari de l’esquèrra basquista que l’estat veniá de declarar illegal lor partit

La Cort Europèa dels Dreches Umans a condemnat l’estat espanhòl per aver declarat inelegible l’èx-president del parlament basco Juan María Atutxa en 2003. Aqueste aviá alara refusat de dissòlver lo grop parlamentari de l’esquerra basquista, que l’estat espanhòl aviá declarat illegal. Lo tribunal d’Estrasborg dona rason a Atutxa e als tres membres de son burèu, Kontxi Bilbao e Gorka Knörr.
 
Atutxa, Bilbao e Knörr deguèron recórrer a la justícia europèa perque la via judiciària espanhòla aviá ratificat lor condemna de venir inelegibles e de pagar de multas d’entre 12 000 e 18 000 èuros per desobesissença. Quitament lo Tribunal Constitucional espanhòl aviá confirmat aquela senténcia, qu’ara la cort alsaciana ven de refutar.
 
La senténcia d’Estrasborg soslinha que la cort suprèma espanhòla condemnèt Atutxa, Knörr e Bilbao sens escoltar lor testimoniatge, que decidiguèt sus las “intencions” dels tres elegits “en examinant de faches provats en instàncias inferioras” e “en arribant a la conclusion per deduccion, sens aver escotat los interessats qu’aguèron pas l’escasença d’expausar lors rasons al tribunal”. Per totes aqueles motius, la Cort Europèa dels Dreches Umans considèra que “segon l’ensems de las circonstàncias del procès”, los tres elegits “foguèron privats de lor drech a la defensa”.




[Poblejat dins www.jornalet.com]

Nenhum comentário:

Postar um comentário