Bretanha: encara una comuna que s’engatja pel galò

La comuna d’Arjentrë a signat la carta Dam yan, dam vèr per la lenga romanica de Bretanha

La comuna d’Arjentrë (Bretanha) a signat la carta Dam yan, dam vèr (Òc-ben, de segur) per la lenga galò lo dissabte 24 de junh. Lo galò es la lenga istorica d’Arjentrë, una comuna del país de Vitrë. S’agís d’una comuna de las Marchas de Bretanha ont la lenga bretona es pas jamai estada parlada, e mai aquò aja pas empachat la municipalitat de signar la carta pel breton en 2012. Tanben i a de panèls en breton a las entradas de la vila. Desenant, las doas lengas de Bretanha son reconegudas sus lo territori de la comuna.

 

Segon lo maire Jean-Noël Bévière, lo sit internet serà revirat en galò e dins lo bulletin municipal i aurà una plaça per aquesta lenga. En mai d’aquò, la comuna pensa de far de rescontres debats en galò amb lo mond d’Arjentrë, e lo lògo de la carta pel galò serà placardat a las intradas.

 

Arjentrë es la quinzena comuna que signa la carta pel galò. Una trentena d’associacions e d’entrepresas o de mèdias an fach tot parièr.

 

Cal notar tanben que lo discors d’investidura del novèl president del conselh regional de Bretanha, Loïg Chesnais-Girard, que foguèt prononciat lo 22 de junh, es estat traduch en breton e en galò dins la comunicacion del conselh regional.

 

 

 

Fabien Lécuyer

[Poblejat dins www.jornalet.com]