Creadas en 1976, las escòlas en lenga bretona tenon 46 centres e 4242 escolans
Las escòlas Diwan de Bretanha, en lenga bretona, an complit 40 ans. La primièra classa se dobriguèt lo 23 de mai de 1977 a Gwitalmeze e aviá cinc escolans.
Las escòlas Diwan foguèron creadas en 1976 per de militants de la lenga bretona. Dempuèi lo primièr centre, lo de Gwitalmeze, Diwan s’es espandit pel país breton e dins París. Ten uèi 46 escòlas que van de la mairala fins als divèrses nivèls de segondari, e tòca 4242 escolans, segon çò que rapòrta Nationalia. Segon aquela donada, mai del 40% d’escolans bretons seguisson l’ensenhament de lor lenga celtica dins las escòlas publicas e privadas (catolicas).
Per festejar aquel anniversari, l’ostal d’edicion Yoran Embanner a publicat lo libre entitolat Diwan 40 ans déjà ! Ur skol e brezhoneg (Diwan, ja 40 ans! L’escòla en breton). Dins aquel obratge en francés e breton, la professora Fanny Chauffin del licèu Diwan de Karaez —considerat coma lo melhor licèu de França— explica l’istòria de Diwan e compara lo ret de las escòlas immersivas bretonas al de las autras escòlas similaras de las nacions sens estat d’a l’entorn, dont nòstra Calandreta, que festejarà son 40n anniversari en 2019.
Las escòlas Diwan contunhan d’èsser associativas, liuras e gratuitas. An l’estatut de servici public, mercé a un contracte amb l’estat. Son subvencionadas per las collectivitats localas e territorialas (comunas, departaments e region) e per de dons que provenon de particulars.
CHAUFFIN, Fanny. Diwan 40 ans déjà ! Ur skol e brezhoneg. Yoran Embanner 2017. 360 paginas. 25 èuros
[Poblejat dins www.jornalet.com]
Sem comentários:
Enviar um comentário