Niça: se legís pel primièr còp lo jurament d’Ipocrates en lenga còrsa

O faguèt dins l’encastre rigorós d’una sostenença de tèsi lo jove practician còrs, Dumenicu Baldocchi

An legit per primièr còp lo jurament d’Ipocrates en lenga còrsa, e o an fach en Occitània. O faguèt dins l’encastre rigorós d’una sostenença de tèsi lo jove practician còrs, Dumenicu Baldocchi, a la facultat de Medecina de Niça, çò rapòrta Corse Matin.

 

S’agís d’un manifèst etic sus las practicas medicalas escrich per Ipocrates fa aperaquí 2500 ans, que i aderisson la majoritat dels mètges. La traduccion d’aquel tèxt en còrs la faguèt lo president de l’Assemblada de Corsega, Jean-Guy Talamoni.

 

Aquel episòdi inedit estonèt los membres de la jurada e esmoguèt los pròches, los amics e los parents de Baldocchi, e quitament los jornalistas de Corse Matin.

 

La tèsi que se presentava èra entitolada “Efièch de l’estimulacion transcraniana a corrent dirècte sus las allucinacions farmacoresistentas en çò dels pacients que patisson d’esquizofrenia”. E Baldocchi la defendèt amb la tòca de proposar als espitals de Corsega aquela tecnica d’electroestimulacion del cervèl que ja es emplegada endacòm mai per sonhar una depression, calmar de dolors o ajudar un pacient a trobar sas capacitats cognitivas après un accident vascular cerebral.

[Imatge: Corse Matin - poblejat dins www.jornalet.com]