Lo Hestiv’òc d’ongan aurà una cobertura mediatica excepcionala en occitan

Entre lo 18 e lo 21 d’agost, la FIMÒC organiza cada jorn quatre oras d’emissions en dirècte per uèch ràdios d’Occitània tota

 

 

Lo festenal Hestiv’òc, que se debana a Pau del 18 al 21 d’agost, aurà una importanta cobertura mediatica en occitan. La Federacion Interregionala dels Mèdias Occitans (FIMÒC), que Jornalet ne fa partida, a signat una convencion amb l’associacion Accents du Sud, organizaira del festenal, amb la tòca d’enfortir la visibilitat de la creaccion occitana.
 
D’un costat, la FIMÒC organiza cada jorn quatre oras de dirècte sus las antenas de Radio Oloron, Ràdio País, Ràdio Occitània e tornadas difusar sus Ràdio Albigés, Radio entre 2 Mers, Ràdio Lenga d’Òc Montpelhièr, Radio Saint-Affrique e Ràdio Larzac.
 
De son costat, Accents du Sud s’engatja a citar la FIMÒC e sos mèdias associats (Ràdio Occitània, Ràdio País, Radio Oloron, e las autras ràdios, mas tanben Jornalet e La Setmana) dins las presas de paraula, lo sit internet e dins las plaquetas.
 
Ongan, l'estand de la FIMÒC serà sus l’empont de l’Sporting Kafé, al numèro 1 del baloard d’Aragon a Pau, d’ont se farà las emissions en dirècte. Los jornalistas occitans convidan tot lo public a i anar e i participar: “Ça-vietz nombrós e participatz aus jòcs, animacions e concèrts organizats dab lo Sporting Kafé!”, çò ditz lo comunicat de la FIMÒC.
 
 
 
 

 

[Imatge: Paraulas en Òc - poblejat dins www.jornalet.com]