Bearn: lo collectiu Tòca-i se Gausas a tornat manifestar per una vertadièra politica lingüistica

Los manifestants èran desguisats en bascos per plànher las diferéncias entre las politicas destinadas a l’occitan e al basco

Lo collectiu Tòca-i se Gausas tornèt manifestar dimècres passat davant l’ostal del departament a Pau (Bearn) per fin d’exigir “ua vertadèra politica lingüistica en Bearn”. Aqueste còp, los manifestants èran desguisats en bascos per plànher las diferéncias entre las politicas destinadas a l’occitan e al basco. En mai d’aquò, reclaman que se suprimisca “las baishas injustas de las subvencions qu’estigmatizan los actors d’aquera quita politica”.

 

Los manifestants denóncian la diferéncia de 400 000 èuros entre la politica lingüistica basca e l’occitana e constatan la baissa de mai de 120 000 èuros entre lo budget primitiu e lo vòte del 27 de mai, segon çò que rapòrta La Setmana, que sos jornalistas èran sus plaça. “Qu’ei de non pas acceptar de trobar, suu teritòri deus Pirenèus Atlantics, ua lenga de segonda zòna e ciutadans de segonda zòna”, çò escriguèron los manifestants dins un comunicat.

 

Demandan als elegits del conselh departamental dels Pirenèus Atlantics de prene exemple suls elegits bascos en carga de la lenga e de la cultura bascas. Es per tant que manifestèron desguisats en bascos en temps de fèsta: amb un bonet, una camiseta blanca, un cairat verd e lo drapèl basco.

 

Lo movement a ressuscitat lo crit de guèrra “Tòca-i se gausas!” (etiqueta #tocaisegausas), emplegat per Gaston VII quand defendiá la sobeiranetat de Bearn.

[Poblejat dins www.jornalet.com]