Capita mal la concentracion contra lo catalan a Saragossa

I assistiguèron nonmàs qualques dotzenas de manifestants

La concentracion tant anonciada contra lo catalan en Aragon, que se faguèt dimenge de matin a Saragossa, finiguèt que rassemblèt just que just qualques dotzenas de manifestants. Despleguèron de pancartas contra la lenga catalana e exigiguèron que lo govèrn aragonés mantenguèsse la denominacion de LAPAO per la lenga catalana parlada dins la Franja de Ponent.

 

La concentracion èra estada convocada per la plataforma aragonesa No Hablamos Catalán (Parlam pas Catalan), contra la decision de las Corts d’Aragon d’incorporar a la Lei del patrimòni cultural un article que ditz que lo catalan e l’aragonés son las lengas pròprias d’Aragon.

Aquela decision del parlament aragonés, qu’a obtengut lo sosten del PSÒE, de Podèm, de la Junta Aragonesista (CHA) e d’Esquèrra Unida (IU), es lo primièr pas cap a l’abolicion de la polemica Lei de las lengas aprovada en 2013 pel Partit Popular (PP) e lo Partit Aragonés (PAR), una lei que pretendiá impausar los noms de LAPAO e LAPAPYP per se referir al catalan e a l’aragonés. Lo novèl president aragonés, lo socialista Javier Lambán, ja aviá anonciat l’estiu passat que l’aboliriá e que recuperariá la lei lingüistica de 2009, que reconeissiá l’usança de l’aragonés al nòrd d’Aragon e del catalan dins la Franja.

 

A la convocacion de la manifestacion avián aderit lo Partit Popular d’Aragon, lo Partit Aragonés, UPYD e lo Blòc Aragonés.

[Poblejat dins www.jornalet.com]