Se finança una manifestacion neofaissista amb d’argent del Parlament Europèu

Lo partit europèu Aliança per la Patz e la Libertat a canalizat 200 000 èuros de sa subvencion a l’organizacion de l’eveniment

Los partits neonazis europèus poiràn organizar un acamp lo 28 de mai que ven a Estocòlme (Suècia), finançat amb d’argent obtengut del Parlament Europèu, çò rapòrta la revista suedesa Expo, e o confirma Vilaweb.

Dins aquela manifestacion i aurà de membres d’Aliança per la Patz e la Libertat (APF en anglés, APL en occitan), un partit europèu qu’amassa los neonazis grècs de Chrysi Avgi (Alba Daurada), lo Partit Nacional Democratic Alemand (NPD), los italians de Fòrça Nòva (FN) e lo partit nacionalista suedés Svenskarnas (SvP), entre d’autres. Segon çò que rapòrta Expo, l’APF recep una subvencion de 400 000 èuros del Parlament Europèu, que 197 625 son estats canalizats a la fondacion filonazi Europa Terra Nostra, qu’organiza aquel recampament.

An nomenat aquel acamp “Manhem Day”, e dins las activitats previstas i a de conferéncias fachas per de neonazis coneguts coma Magnus Söderman, èx-militant de l’organizacion Motståndsrörelsen (Resisténcia Nordista), que se jonguèt a l‘SvP en 2012, o Jonas De Geer, dirigent faissista conegut qu’es ara dins l’SvP.

Escàndol al Parlament Europèu 

Dins lo Parlament Europèu, plusors èurodeputats comprenon pas que de partits que fomentan la xenofobia, lo racisme e l’islamofobia, recébian aquel argent public. Es per aquò que dimècres que ven se debatrà aquel afar, a la demanda del president de la cambra Martin Schulz. Aqueste a ja manifestat, en d’autras escasenças, que vòl reformar lo finançament dels partits europèus. 

[Poblejat dins www.jornalet.com]