Se remembra a Ventemilha lo massacre dels italians d’Aigas Mòrtas

Una molonada locala, encoratjada per un cònsol nacionalista francista xenofòb, ataquèt los sasonièrs italians en ne tuant un desenat e ne ferissent mai de cent cinquanta

Uèi dijòus 10 de març, a 17h30 se remembra a la Bibliotèca Aprosiana de Ventemilha (Ligúria) lo massacre dels italians d’Aigas Mòrtas (Camarga). L’escrivan Enzo Barnabà, autor dels libres Aigues-Mortes, il massacro degli italiani, Ed. Infinito, 2015, e de Mort aux Italiens! Le massacre d’Aigues-Mortes”, Ed. Editalie, 2012, reconstruís, mejançant d’imatges de l’epòca, lo chaple que se passèt a la vila camarguesa lo 17 d’agost de 1893.

 

En mai d’aquò, deman divendres Jean-Pierre Jouglet, Pierre Lucat e Paolo Cipriano, presentan al teatre comunal un espectacle entitolat Cloruro di Odio, Requiem pour Aigues-Mortes, una coproduccion d’artistas dels dos costats frontalièrs que cèrca de reconstituir l’eveniment, de ne far remembre del temps qu’a en mira de reconciliar la memòria istòrica dels dos païses.

 

 

Lo chaple de 1893

 

Los 16 e 17 d’agost de 1893 aguèt luòc a Aigas Mòrtas(Camarga) lo pogròm mai sagnós de l’istòria d’Occitània. De centenats d’obrièrs sasonièrs provenents de Piemont, Ligúria, Lombardia, Toscana, Venèt... foguèron agredits e massacrats per una molonada armada, empusada pels prepauses xenofòbs dels discorses oficials sus la “fiertat d’èsser francés”. Tuèron almens dètz personas del temps que los ferits se comptavan a l’entorn de cent cinquanta a causa dels linchaments, dels còps de baston, del negatge e de las balas. L’eveniment es tanben un dels escandals judiciaris màgers de l’epòca, pr’amor que cap de condemnacion foguèt pas prononciada per la justícia.

 

L’eveniment venguèt un afar diplomatic. Ne parlèron los mèdias de pertot, mai que mai en defòra de l’estat francés. En Itàlia i aguèt de susmautas antifrancesas. L’estat italian e l’estat francés arribèron a una solucion diplomatica. Se paguèt d’indemnitats als salariats italians e lo cònsol nacionalista francés d’Aigas Mòrtas, Marius Terras, demissionèt. 

[Poblejat dins www.jornalet.com]