Demandan mai de preséncia del catalan sus France 3

Una associacion d’ensenhaires a demandat l’intervencion dels elegits per qu’aumenten las emissions en catalan de la cadena publica

L’associacion Aplec per l’ensenhament del catalan en Catalonha Nòrd a demandat als elegits municipals, departamentals e regionals, lor intervencion per obténer un aument de las emissions en catalan de France 3. Segon l’Aplec, Catalonha Nòrd es la region que sa lenga territoriala es mens presenta a la television, çò que considèran coma “indigne e quitament umiliant pels catalans”.

 

Segon lo Rapòrt al Parlament sus l’emplec de la lenga francesa 2015, lo catalan representa l’1,7% de las emissions de France 3, çò es aperaquí 20 oras d’emission per an. Segon aquel rapòrt, l’occitan dins tot son ensemble representa l’8,74%, valent a dire aperaquí 107 oras d’emission per an.

 

La proposicion de l’Aplec a France 3 es que s’emeta, almens, las informacions d’actualitat cada jorn e un programa setmanièr tipe magazine, per far un minim de 60 oras annalas en catalan. L’Aplec precisa que los escolans qu’estúdian lo catalan an de besonh d’aquelas emissions. En mai d’aquò, las audiéncias confirman que las familhas vòlon de mai en mai lo catalan a la television. 

[Poblejat dins www.jornalet.com]