Marselha: un menor fa una agression antisemita contra un professor josieu

Lo jove agressor, que ditz agir en nom de l’Estat Islamic, poiriá èsser un desequilibrat

Arrestèron ièr a Marselha un adolescent de 16 ans. Lo detenguèron après qu’el ataquèt amb un cotèl un professor josieu. L’atac se produguèt quand lo professor anava vèrs l’Institut Francoebraïc ont fa de corses de religion. Portava un costum tradicional, la quipà e un exemplar de la Torà dins las mans. Recebèt un còp de cotèl a l’espatla, tombèt al sòl, se relevèt e s’enfugiguèt. L’agressor lo perseguiguèt, ensagèt de donar d’autres còps de cotèl del temps que lo professor se protegissiá amb sa Torà. Los crits de la victima alertèron de passants e de vesins que metèron l’agressor en fugida. 

Voliá tuar de josieus e de policièrs

Detengut per la polícia, l’adolescent revendiquèt son acte. Segon lo procuraire, lo jove agressor auriá dich als policièrs qu’agissiá en nom de l’Estat Islamic. E mai auriá confessat que l’autre cotèl qu’aviá èra “reservat a de policiers”, que tanben auriá dich de los voler tuar amb d’armas de fuòc. 

Se poiriá tractar d’un desequilibrat

Segon los primièrs elements de l’enquèsta, lo jovent se seriá radicalizat via Internet, çò que se confirmarà après l’analisi de son ordenador. “Mestreja cèrtei dialecticas, mai se vei ben tanben que mestreja pas completament lei fondaments de l’islam”, çò diguèt lo procuraire als mèdias.

En rason de las revendicacions de l’agressor, l’an mes en gàrdia a vista per “temptativa d’assassinat en rason d’una apertenéncia religiosa” e “apologia del terrorisme”. La seccion antiterrorista de París es estada informada, se poiriá sasir del dorsièr e prene la man sus l’instruccion.

Segon La Provence, quand la polícia arrestèt l’agressor, el menacèt puèi de contunhar d’atacar de personas de confession josieva. D’autres mèdias, coma France TV, afirman que se tractariá d’un desequilibrat.

Lo ministre francés de l’interior, Bernard Cazeneuve, condemnèt l’agression sus Twitter en la qualificant d’“agression antisemita indignanta".

Lo 18 de novembre passat, tanben a Marselha, lo professor d’istòria d’una escòla josieva del 13n arredondiment se faguèt ferir al braç e a una camba per dos òmes, per carrièras. Los agressors arribèron sus un escotèr e s’arrestèron a la nautor de l’ensenhaire, que portava una quipà. Los nèrvis l’insultèron, li mostrèron una camiseta de l’Estat Islamic e arborèron sul telefòn mobil una fòto de Mohamed Merah.

[Poblejat dins www.jornalet.com]