La nacion occitana representada al Parlament de Catalonha

Se confirma que l’occitanista aranesa Mireia Boya (CUP), una collaboradora de Jornalet, serà deputada al Parlament catalan

L’acòrdi de govèrn in extrèmis entre las doas formacions independentistas al Parlament de Catalonha, ièr passat, permetèt ièr l’eleccion del nòu president de la Generalitat, Carles Puigdemont (Amassa per l’Òc, CDC) a la majoritat absoluda. Los 70 vòtes independentistas —fàcia a 63 contra e 2 abstencions— empediguèron la dissolucion del Parlament eissit de las urnas lo 27 de setembre passat e la convocacion automatica d’eleccions anticipadas en març.

Per tant, après la demission anonciada del deputat de la CUP Ramon Usall per de rasons de santat, l’occitanista aranesa Mireia Boya, que foguèt numèro 2 de la lista independentista anticapitalista dins la demarcacion de Lhèida, s’assetarà lèu-lèu al Parlament de Catalonha. I serà una votz de la nacion occitana.

Defendre la nacion occitana en Catalonha

Durant la campanha electorala, Boya faguèt d’efièch totas sas intervencions en occitan, sovent davant l’estonament dels jornalistas presents. “Pensi que i deu auer aranesi en aguest procès d’independéncia entà qu’era nacion occitana i sigue representada”, çò diguèt a Jornalet. E mai, Boya precisèt que “se i a aranesi que cren qu’era independéncia ei çò de melhor entà Catalonha e Aran, e tanben entà tota Occitània, cau dar un pas tà deuant damb tot açò des dera esquèrra rompedurista”.

Ja i aviá un deputat aranés al Parlament de Catalonha, e mai se parla pas occitan; se tracta de Javier Rivas de Ciutadans. Mas la preséncia de Mireia Boya assegurarà que se parle en aranés dins la cambra, coma s’es fach dins las doas legislaturas precedentas amb Francés Boya (PSC), deputat entre 1999 e 2010, e Àlex Moga (CDC), entre 2012 e 2015.

---

Barcelona TV - #aranésoc: Mireia Boya analisa los resultats electorals en Aran

[Poblejat dins www.jornalet.com]