Lo partit xenofòb Plataforma per Catalonha a perdut la majoritat dels conselhièrs municipals qu’obtenguèt fa 4 ans
Lo partit racista nomenat Plataforma per Catalonha, qu’obtenguèt qualques desenats de conselhièrs municipals dins qualques comunas del Principat de Catalonha en 2011, a practicament desaparegut a las darrièras eleccions municipalas que se celebrèron dimenge passat. Ont la siá casuda es estada màger es dins la vila de Vic, ont la formacion de Josep Anglada èra fins ara lo segond partit de la vila amb cinc conselhièrs municipals, mas ara es en darrièra posicion e solament n’aurà un.
De mai, aquel partit xenofòb a perdut tota sa representacion dins d’autras vilas ont èra important, coma es lo cas a Olot, L’Hospitalet de Llobregat, Santa Coloma de Gramenet, Sant Boi de Llobregat, Tàrrega, Mollerussa e Ripoll.
Los racistas tendràn representacion solament a El Vendrell, ont avián 5 conselhièrs e ara n’auràn 3; a Salt, ont son passats de 3 a 2 conselhièrs; e a Mataró, ont de 3 conselhièrs ara ne demòra solament 1. A Amposta tenon lo sol conselhièr qu’avián.
Lo discors d’aquel partit es contra l’immigracion qu’arriba dins l’Estat espanhòl, mai que mai la que ven de l’America Latina e del Nòrd d’Africa. Se mòstran dobèrtament islamofòbs, exigisson cap de tolerància envèrs los malfachors e los terroristas e defendon las valors tradicionalas de la familha.
Lo discors racista del PP a Badalona capita mal
De mai, a Badalona, lo cònsol del Partit Popular (PP), conegut per son discors xenofòb, a patit tanben una fòrta revirada. Dins son eslogan de campanha electorala, parlava de “netejar Badalona”, en tenent un discors contra los immigrants. Amb los darrièrs resultats, los partits d’esquèrra parlan d’un pache per fòrabandir lo cònsol racista.
[Poblejat dins www.jornalet.com]
Sem comentários:
Enviar um comentário