Una investigasion de la rezistansia aktiva de los konversos en la Espania kontra la Inkizision mos avia permetido de relatar el asasinato del Inkizitor Pedro de Arbués.(1) Una investigasion de mizmo orden sovre la Inkizision en Portugal mos revela aparte de evenimientos relevantes, un akto semejante, ma, esta ves, sovre el asasinato por konversos de un otro konverso, Henrique Nunes.
Por Gad Nassi
Por Gad Nassi
El Rey Manuel I
Kuando los djudios de Espanya fueron ekspulsados, unos 150.000 de eyos se avian refujiado en Portugal. El Rey João II (1481-95), interesado a enrikeser su trezoro, los avia akseptado a su payis, en ovligandolos de pagar una taksa. Famiyas rikas fueron obligadas de pagar 100 kruzados; los artizanos fueron akseptados en el buto de uzarlos en la produksyon de armas. Al rabino Izak Abuav kon 30 famiyas rikas les fue akordado de establisirse en Oporto. La grande mayoriya pago 8 kruzados por persona para pueder kedar en Portugal fina 8 mezes. Kuando, achakes de una penuria de naves, munchos d’estos no estavan puediendo salir del Portugal, el Rey João II los rendio en esklavaje. Las kreaturas fueron arankadas de sus famiyas i fueron transportadas a la izla aleshada de São Tomé, ande fueron konvertidas al Katolisizmo.(2)
Despues ke aksedo al trono, Manuel I (1495-1521) deklaro en el mez de Desiembre, 1496, ke fina en un anyo dingun djudio o moro no devia kedar en Portugal. La persuasion i el suplisio fueron uzados sin grande rezultado para baptizar los djudios. En el mez de Marso, 1497, todos los minores djudios fueron baptizados por la fuersa i fueron detenidos para impedir sus parientes de kitar el payis. Ke fueron, i eyos, obligados a konvertirsen.
Afito ke durante unos kuantos anyos, la rekolta fue flaka i en segito una karestia esbrocho. De mas, una epidemia se adjusto a la ambre. Los djudios fueron akuzados de aversen akaparado i eksportado el trigo para provokar la ambre.
Un diya del anyo 1506, saserdotes dominikanos, en anunsiando ke Maria la Santa avia aparesido en un espejo, arekojeron una masa de djentoria en la eglisia. En segito, dos saserdotes empesaron a kaminar en las kayes de Lisbon en gritando: Erezia! Erezia!
Dekreto del Rey Manuel I,
ordenando la konversion forsada
Serka de diez mil fanatikos, a los kualos i marineros de diferentes nasiones se avian adjustado se vazyaron a las kayes detras de los saserdotes en matando durante dos diyas, los marranos ke estuvieron enkontrando. Se pensa ke entre 2,000 i 4,000 de marranos perdieron sus vida en este masakro.
La traizion de Henrique Nunes
Ainda en 1516, el Rey Manuel I avia sin sukseso propozado al Papa Leo X, de establisir la Inkizision en Portugal, asigun el egzemplo de la Espanya. João III (1521–57), el suksesor de Manuel, era de karakter flako i submetido a la influensa del kuerpo relijyozo. Mizmo ke en el empesijo de su reyno se avia abstenido de tomar mezuras violentes kontra los konversos, kon el tiempo este aktitud se avia trokado.
João III enkargo a Jorge Thermudo de prezentarle un raporto sovre el komportamiento de los konversos.
En 1524, Thermudo afirmo ke una partida de los marranos estava observando el Shabat i el Pesah, ke estava neglijando las seremonias i uzos kristianos, ke se estava absteniendo de asistar a la misa i a los ofisios i de konfesarse, de demandar la onksyon ekstrema antes de murir, de enterarsen en simetarios kristianos, o de de resitar las misas para las almas de los muertos.
El Rey Joao III
Aparte de Thermudo, el Rey João avia enkargado espiones. Entre estos, el muevo kristiano Henrique Nunes.
Munchas nuves de misterio kuvijan la biografia i la personalitad de Nunes. Se save ke nasido en Borba, Portugal, Nunes fue probablamente baptizado en Castilia. Estuvo sirviendo, de 1499 fina 1509, a Diego Rodríguez Lucero, Inkizitor de Kordova, konosido por su malisia i su krueldad. João, lo avia yamado de las Islas de Canaria, en el buto de profitar de su eksperiensa para establisir la Inkizision en Portugal.
El Rey ordeno a Nunes de familiarizarse kon los konversos para obtenir provas sovre sus observasion de las tradisiones djudias. Nunes adreso al Rey raportos, ande fueron ekspozadas una lista de konversos ke le avian komunikado konfidensialamente sus aderensia al Djudaizmo, ansi ke, diversas metodas para kombatir el praktiko de la Ley Djudia, i las indikasiones por las kualas la fidelidad de los marranos al Djudaismo puede ser rekonesida.(3)
En segito, João mando a Nunes a Espanya para topar apoyo a su plano de establisir la Inkizision en Portugal. Portanto, los marranos avian deskuvrido esta traizion. En 1524, dos marranos, Diogo Vas de Olivença i Andreas Dias de Viana, degizados en relijiozos fransiskanos, segieron a Nunes i lo mataron en Valverde, kuando se estava aparejando a pasar la frontiera para Espanya.(4)
Diogo i Andreas fueron deskuvridos i despues de ser torturados, sus manos fueron kortados, i fueron egzekutidos.
Nunes fue onorado komo un martirio i kuaji beatifikado en seando surnomado Firme-Fé, fermo en su fey. A su tomba fueron atribuados poderes mirakulozos de sanar malatias.
Despues de este asasinato, el Rey avrio una enkuesta en menasando a los kulpavles kon kastigos de los mas teribles. Portanto kon la aparision inesperada de David Reubeni en Lisbon – pretenyendo ser el reprezentante de los trivos pedridos de Israel – se iva modifiar el kurso de los evenemientos.(5)
Verso la Inkizision
Las ultimas rezistensias
Reubeni en poko tiempo fue el sentro de las ekpektasiones mesianikas de los konversos en Portugal i en Espanya. Sus kreensia en la mision de Reubeni era tan fuerte ke los konversos se engajaron en un komportamiento de los mas odasiozos ke su kastigo era klaramante la muerte.
Munchos marranos de Espanya ke eran kandidatos para ser kemados en la ogera se avian refujiado a Campo-Mayor en Portugal. I, koza kuaji inkreyible, no fueron de dinguna manera molestados.
Enkorajados por esto, munchos marranos aboltaron armados a Badajoz, en Espania, de ande se avian fuyido i liberaron a una marrana ke estava en prezo.
En segito a este akto, el apoyo por la establision de la Inkizision en Portugal empeso a eksprimirse de una manera mas fuerte. De mas, kuando un terremoto akontesio en 1531, el puevlo interpreto a esto en tanto ke el kastigo del Dio por la duplisidad de los konversos.
No puediendo rezistir a la presion manifestada, el Papa Clemente VII otorizo la establision de la Inkizision en Portugal, nominando a Diogo da Silva, el konfesor de João, en tanto el primer Inkizitor Jeneral. El sanyo kontra los marranos se agravo muncho mas, kuando en 1539, una afisha fue enkolgada a la puerta de la katedrala i de syertas eglisias en Lisbon. En esta afisha fue proklamado ke el Mashiah no avia ainda arivado, ke el Kristo no era el Mashiah i ke el Kristianismo era una mintira. Portugal entero fue sakudido por esta argumentasion i una enkuesta fue avrida para topar el kulpavle.
Kon la esperansa de divertir la suspision, los muevos kristianos, esta ves, metieron a las puertas de las eglisias i de la katedrala a esta proklamasion: “Yo, el otor de la primera proklamasion, no so ni espanyol i no portugezo, ma so inglez…”
A la fin, el verdadero perpetrator, un marrano yamado Manuel da Costa fue desvelado. Da Costa fue kemado en la ogera despues ke sus manos fueron kortadas.
* * *
Es en Septiembre 20, del anyo 1536, ke la primera ogera de la Inkizision en Portugal fue konsekrada en Lisbon. I, en Djulio 16, 1547, kon la bula papala, Meditatio Cordis, la Inkizision iva ser enteramente establisida en Portugal.
Mas de 40.000 personas fueron implikadas en la Inkizision en Portugal. Durante tres siglos de obskurantismo i de orror, 30.000 akuzados fueron kondanados a ser kemado. 750 de estos fueron egzekutidos. 29.000 fueron rekonsiliados kon la Eglisia. 600 fueron kemados en efijia.
En Marso 31, 1821, la Inkizision fue definitivamente abolisada en Portugal.
—————————————————————–
(1) Ver Gad Nassi, “El Inkizitor Asasinado: Pedro de Arbués” Aki
Yerushalayim, 28, 82, Yerushalayim, Oktobre, 2007.
(2) Es estimado ke unas 2.000 kraturas fueron deportadas. Sus suerte no es konosida. Ver Moshé Liba,”Esclavos en São Tomé”, Los Muestros, 69, Décembre 2007, 13-16.
(3) Por mas detalios sovre Henrique Nunes, ver Alegzandre Herculano,
History of the Origin and Establishment of the Inquisition in Portugal,
Translated from the Portuguese by John C. Branner, Ktav publishing
House, New York, 1972, pp. 286-297
(4) Asigun syertas fuentes Nunes fue asasinado en tornando de la Espanya.
(5) Ver Gad Nassi,”La Armada Sekreta de David Reubeni”, El Amaneser, 3, 30, Agosto 2, 2007.
[Orijen: www.esefarad.com]
Sem comentários:
Enviar um comentário