Lo rei d’Espanha a abdicat

Lo president espanhòl a anonciat lo començament del procès successòri per nomenar rei lo prince Felip de Borbon

Lo president del govèrn espanhòl, Mariano Rajoy, s’es presentat als mèdias, aqueste matin a 10h30, per far una declaracion institucionala en tot anonciar l’abdicacion del rei Joan-Carles Ir, après trenta nòu ans de règne: “Joan-Carles m’a anonciat la volontat de renonciar al tròn e de dobrir lo procès successòri”. “Uèi meteis lo rei n’explicarà las rasons”, çò a apondut.

 

“Ai trobat lo rei qu’es convencut qu’es lo melhor moment de far amb normalitat lo cambiament de cap de l’estat, amb la transmission de la corona al prince d’Astúrias”, çò a dich.

 

Segon lo president espanhòl, deman se convocarà un conselh dels ministres extraordinari per complir las previsions constitucionalas a respècte d’aquela succession: “Espèri que dins un periòde brèu las Corts espanhòlas proclamaràn coma rei d’Espanha lo qu’es uèi lo prince d’Astúrias”, e a dire, son filh Felip de Borbon, que vendrà Felip VI. 

[Image: Casa de S.M.el Rey - poblejat dins www.jornalet.com]