Una execucion malastrosa e crusèla a fach reviure lo debat sus la pena de mòrt als Estats Units

Sala d'execucions de la preson de San Quentin (California)
© http://www.flickr.com/photos/37381942@N04/

Dimars passat, l’estat d’Oklahoma suspendèt la segonda execucion qu’aviá programada, après que lo primièr condemnat, Clayton Lockett, moriguèt d’un atac al còr quand èra estacat a la liechòta ont lo devián tuar. Venián de suspendre tanben son execucion perque “i aviá quicòm que trucava”, çò informèt lo quite condemnat als borrèls. Son agonia durèt 43 minutas.

Segon los testimònis presents a la preson de McAlester, Lockett patiguèt de convulsions violentas, alenèt mal e se torcèt sus la liechòta en ensajar de se desliurar dels ligams. En aquel moment, amb la maissa completament en tension, capitèt de prononciar qualques mots en indicant que i aviá quicòm que trucava. Li avián injectat tres potingas, que la primièra lo deviá far pèrdre consciéncia, que la segonda deviá arrestar la respiracion e que la tresena deviá aturar lo còr. Lo mètge, que supervisava sus un ecran las tres linhas correspondent a cada potinga, remarquèt qu’una d’elas se mostrava erratica e que la vena que recebèt l’injeccion aviá espetat. Alavetz, los responsables de la preson decidiguèron de sarrar las cortinas per empedir qu’aquela scèna, la vegèsson la familha, los testimònis, los avocats e los jornalistas, en los informant que se cancelava l’execucion. Lockett moriguèt qualques minutas après un atac al còr, segon çò que rapòrta lo New York Times.

Aquel malastre a menat l’estat d’Oklahoma a reportar, de 14 jorns almens, l’execucion de Charles F. Warner, lo segond presonièr que devián tuar aquel meteis jorn.

Segon l’avocat de Lockett, aquò “foguèt una tortura”. Mai frapant foguèt Adam Leathers, copresident de la Coalicion d’Oklahoma per Abolir la Pena de Mòrt, qu’acusèt l’estat d’aver “torturat un èsser uman amb un marrit experiment inconstitucional”.

Lo president dels Estats Units, Barack Obama, diguèt que l’execucion de Lockett foguèt “inumana”, mentre que la governadora de l’estat d’Oklahoma, Mary Fallin, diguèt en un comunicat que “Lockett demorèt inconscient après l’administracion de las potingas correspondentas”.

Los Estats Units, l’Arabia Saudita, China, Iran e Iemèn son los païses que tuan mai de personas cada an amb la pena de mòrt.

D’experiments amb de substàncias nòvas per manca de tiopental

Benlèu dins los jorns venents se sauprà se las potingas marchèron pas, o ben se la manca de medicaments provoquèt qu’ensagèsson de substàncias nòvas, segon çò que rapòrta lo jornal espanhòl El País.

En la davalada de 2010, las presons estatsunidencas agotèron tot lo tiopental qu’avián. Aquò es l’anestesiant que s’emplegava per endormir los condemnats a la pena capitala abans de lor injectar dins la vena las autras doas potingas que los tuavan: lo pancuròni, que paralisa totes los muscles levat lo còr e qu’arrèsta la respiracion; e lo clorur de potassi, qu’arrèsta lo còr e que provòca fin finala la mòrt.

L’estat d’Oklahoma emplega lo midazolam per l’insconsciéncia, lo vecuròni per arrestar la respiracion e lo clorur de potassi per arrestar lo còr.

Dempuèi qu’an agotat lo tiopental, los 32 estats dels Estats Units qu’encara tenon la pena capitala an fach d’experiéncias amb de nòvas substàncias sus d’èssers umans vius, amb de resultats tragics dins la majoritat dels cases. La situacion que se passèt dimars en Oklahoma, ja s’èra passada en Califòrnia, Kentucky o Arizòna.

Dimars èra lo primièr còp que l’estat d’Oklahoma emplegava lo midazolam, una substància solament utilizada coma calmant dins d’operacions cirurgicalas mendres, pr’amor que lo pacient se calma mas se ten revelhat. E cal soslinhar que “lo ròtle de la primièra potinga es crucial; se fonciona pas, l’efièch dels dos autres fluids que s’aplican pòt provocar una dolor atròça”, çò remarca Richard Dieter, del Centre d’Informacion sus la Pena de Mòrt, un grop que susvelha l’aplicacion de la pena capitala. 

[Poblejat dins www.jornalet.com]