Un verificador ortografic en linha pel sarde

La Region Autonòma de Sardenha ven d’activar lo CROS, que reconeis quaranta mila mots

Dispausar de ressorsas lingüisticas en linha es important, a l’ora d’ara, per quina lenga que siá, mai que mai per las minorizadas. Es donc tot un eveniment que tre ara lo sarde aja lo Curretore Regionale Ortogràficu Sardu (CROS), un verificador ortografic supervisat pel Servici de la Lenga e la Cultura Sarda de la Region Autonòma de Sardenha.

 

Après un an de trabalh, lo programa reconeis quaranta mila mots en lenga sarda e permet de corregir en linha de tèxtes dins aquela lenga latina.

 

Lo verificador s’es desvolopat amb la varietat escricha de l’estandard sarde nomenat “limba sarda comuna” (LSC), adoptada experimentalament en 2006 per la region coma lenga oficiala dels actes e dels documents expedits per aquela institucion. 

[Poblejat dins www.jornalet.com]