Venèt decidirà en junh se fa un referendum sus l’independéncia o mai d’autonomia

Lo conselh regional de Venèt debatrà los 10, 11 e 12 de junh que venon dos projèctes de lei, un d’eles per convocar un referendum sus l’independéncia e l’autre tocant un referendum sus l’autonomia especiala, doas proposicions que caldriá negociar amb l’estat italian. Lo vòte sus l’independéncia l’a prepausat lo partit del Futur Popular, del temps que lo vòte sus l’autonomia especiala l’a prepausat lo Nòu Centredrecha, scission del partit de Berlusconi.

 

De son costat, lo president venèt, Luca Zaia, de la Liga Venèta-Liga Nòrd, es anat uèi a Roma a la conferéncia dels presidents de regions, ont demandarà la conversion de la region de Venèt en una autonomia amb un estatut especial.

 

Aquelas propòstas arriban en seguida del vòte popular independentista que se faguèt fa gaire per Internet, e mai que mai, après las propòstas recentralizairas del novèl primièr ministre italian Matteo Renzi, que vòl una reforma constitucionala per levar de competéncias a las regions.

[Poblejat dins www.jornalet.com]