Un cinquantenat d’eurodeputats signan un manifèst per las minoritats nacionalas e lingüisticas de l’UE

55 deputats del Parlament Europèu, de diferents estats e diferents partits, an clavat la sason parlamentària abans las eleccions que venon en signant un manifèst per protegir las minoritats nacionalas, segon çò que rapòrta Nationalia. Lo tèxt demanda a la Comission Europèa de s’engatjar per la resolucion dels problèmes territorials “quand las solucions bilateralas e intèrnas son pas possiblas”. Al delà, lo document demanda de “preservar la diversitat” e soslinha que totas las personas an drech de causir lor “identitat nacionala” e qu’aquela “decision liura” se pòt pas metre en question.

 

Lo tèxt remembra que 50 milions de personas de l’Union Europèa, çò es, 8% de la populacion, fan partida de minoritats nacionalas. Tanben ditz qu’un europèu sus dètz parla una lenga minorizada, e ten en compte que i a 30 milions de ciutadans de l’Union que lor lenga mairala es una lenga venent de l’immigracion.

 

Los signataris del manifèst demandan que se dessenhe una estrategia europèa de proteccion de las minoritats, que se crèe un organ d’expèrts sus las minoritats nacionalas e lingüisticas per conselhar las institucions europèas, e de leis inalienablas que protegiscan los dreches d’aqueles collectius. En mai d’aquò, recomanda als estats que vòlgan far partida de l’Union Europèa de respectar lors minoritats.

 

Lo document nomenat Manifèst d’Estrasborg es mandat a la Comission Europèa, al Conselh Europèu, al Conselh d’Euròpa, als estats membres e als estats candidats de far partida de l’Union. Demest los signataris cal soslinhar lo deputat ecosocialista còrs François Alfonsi, lo socialista ongrés Csaba Sándor Tabajdi, lo catalan Ramon Tremosa (CIU) e los deputats bascos Inaki Irazabalbeitia (Aralar) e Izaskun Bilbao (EAJ-PNV).

 

Aquesta darrièra faguèt referéncia al procès catalan. “Se l’Union Europèa fa lo mediator en de conflictes territorials en defòra de l’Union Europèa, es completament absurde que s’engatge pas a resòlver de tensions coma las que se vivon en Catalonha, quand es pas possible de las resòlver dins l’estat afectat”, çò declarèt. 

[Poblejat dins www.jornalet.com]