Los djudios de Izmir

Por Moshe Shaul

La komunidad djudia de Izmir fue i ainda es la mas grande komunidad djudia de Turkia despues de la de Estambol. Es kuriozo, djuntos kon esto, ke esta komunidad no fue fondada en los primeros anyos despues de la ekspulsion de los djudios de Espanya, komo las de Estambol, Saloniko, Edirne i otros sentros del Imperio Otomano sino ke bastante mas tadre.

Djuntos kon esto podemos dizir ke Izmir fue tambien una de las sivdades ke tuvieron komunidades djudias desde la epoka biblika. Ya se save, por enshemplo, ke kuando el apostol Paul fue a Anatolia, bushkando a konvertir la povlasion al kristianizmo, munchos de sus sermones fueron dados en sinagogas djudias. Ay testimonios sovre la prezensia djudia en esta rejion en los primeros siglos de muestra era, asta la kreasion del Imperio Bizantino, despues de lo kualo parese ke ya no uvo mas ayi komunidades djudias organizadas.

El aresentamiento de djudios en Izmir i sus entornos empeso solo en la segunda metad del siglo 16. Despues de 1530 empesaron a yegar ayi djudios “s ü rg ü n”, ke bivian de antes en otras sivdades del Imperio Otomano ma fueron exilados de ayi afin de poder povlar a la sivdad de Izmir, ke entonses avia empesado a tomar mas importansia komo prinsipal porto del Imperio Otomano por el kual pasavan las merkansias entre Evropa i el Oriente. Mas tadre yegaron tambien munchos djudios portugezes, ex-konversos ke avian reushido a fuyirsen de Espanya i Portugal, djuntandosen a las komunidades del Imperio Otomano.

Las relasiones de la komunidad kon las autoridades eran bastante buenas. Es verdad ke komo non muzulmanes, los djudios – de mizmo ke los gregos i ermenis – devian pagar una taksa espesiala yamada “harach”, ma esta taksa no era kovrada de manera individuala sino ke era pagada de manera kolektiva, redusiendo ansi al minimo el kontakto i los konfliktos posibles entre los miembros de la komunidad, de manera individuala, i las autoridades.

Avia tambien una restriksion embarasante, i era ke no se podia fraguar muevos kales, sino ke solamente atakanar o restorar viejos kales. Ma en realidad esta restriksion no fue aplikada estriktamente i pudieron ser fraguados bastante kales para los menesteres de la komunidad. El primer fue el kal de Bikur Holim, fraguado por Salomon de Ciaves, un merkader djudio ke avia venido de Holanda. Mas tadre fueron fraguados otros kales mas komo el kal Portugez, el kal de la Sinyora (al nombre de Dona Gracia Nasi), el kal de los Forasteros i mas.

La vida komunitaria era rijida kondjuntamente por un Bet Din, enkavesado por el gran rabino i el konsejo de la komunidad ke era elijido i reprezentava a los miembros de la komunidad. El primer gran rabino fue Yitshak Meir Alevi, ke okupo este posto de 1606 asta su muerte, en 1634. El fue segido por una larga seria de rabinos, algunos de los kualos se distingieron tambien komo autores de livros sovre aspektos diversos de la relijion, komo rabi Haim Palachi, por enshemplo, ke eskrivio 70 livros.

Un kapitolo muy importante en la istoria de la komunidad djudia de Izmir es el ke toka a Shabetay Zvi, ke kon sus pretensiones ke era el Mashiah i ke iva traer la Geula al puevlo de Israel alboroto profondamente al mundo djudio de su epoka. De Erets Israel a Italia i Holanda, pasando por Turkia, Gresia i otros paizes mas, las komunidades djudias se espartieron en dos kampos: los ke se opozavan a el i rempushavan kategorikamente sus pretensiones, i de la otra parte los ke kreeron ke era verdaderamente el Mashiah, sigiendolo siegamente mizmo kuando, konvokado al palasio del sultan onde le fue demandado de eskojer entre la muerte o la konversion al Islam, el eskojo la konversion. Munchos de sus partidarios, kreendo ke esta konversion era un paso ke devia ser echo antes de yegar a la Geula, se konvertieron eyos tambien, kreando ansi la sekta de los D o nmes.

En lo ke toka el aspekto ekonomiko, los djudios de Izmir se mantenian del komersio, ma avia tambien entre eyos ufisiales, tradjumanes (interpretes entre el turko i las prinsipales lenguas evropeas), i mizmo patrones de estamparias. En este ultimo kampo la komunidad de Izmir se distingio por una aktividad intensiva i despues de la fondasion de la primera estamparia por Avraam Ben Yedidia Gabay, en 1657, fueron imprimidos unos 400 livros por 12 estampadores diversos.

En los siglos 18 i 19 esta komunidad gozo de una grande prosperidad en segito al dezvelopamiento de las relasiones komersiales entre Izmir i el Oksidente, espesialmente kon produktos komo lana, tapetes, sereales, pasas i igos sekos, azeyte i mas.

De otra parte la komunidad djudia sufrio tambien de fuertes golpes en segito a fuegos i terretemblos ke kavzaron grandes danyos, entre eyos un fuerte terretemblo en el anyo 1688 i fuegos ke kemaron a vezes kuartieres enteros en los anyos 1743, 1772, 1841 i 1881. Djuntos kon esto la komunidad reusho a remeterse i pudo dezveloparse no solo del punto de vista ekonomiko sino ke del punto de vista kultural tambien. Esta komunidad fue, entre otras, la pioniera del jurnalizmo en ladino. En 1846 fue empesado ayi en la publikasion del primer jurnal en ladino La Puerta del Oriente. El no tuvo larga vida ma en 1871 la aktividad en este kampo fue renovada kon la publikasion de La Buena Esperansa, segida despues por otros jurnales mas, los mas konosidos de entre los kualos eran El Novelista i El Meserret.

Izmir fue tambien, naturalmente, uno de los sentros ande se kreo i se dezvelopo el ladino, en baza de las lenguas ke los djudios de Espanya avlavan antes de la ekspulsion komo el kastilyano, el katalan etc. Eyos mantuvieron tambien kon muncha fidelidad el folklor ke avian traido de Espanya, adjustando tambien de sus propia kreasion. Ma esta kultura empeso a eskayer a la fin del siglo 19 komo konsekuensa de unos kuantos faktores. En primer lugar la aktividad de las eskolas de la Alliance onde la ensenyansa era en fransez. Estas eskolas reusheron a krear una klasa de sefaradis tan empapados de la kultura franseza ke empesaron a menospresiar el ladino, konsiderandolo komo una lengua ke podia servir a lo mas para la komunikasion kon los viejos i las klasas non edukadas de la komunidad.

Otro faktor fue la kreasion de los estados nasionales ke remplasaron al Imperio Otomano i ke anularon la autonomia kulturala ke era dada asta entonses a las komunidades sefaradis, forsandolas a integrarsen en la lengua i la kultura del paiz onde bivian.

Un treser i ultimo faktor fue la imigrasion de la mansevez de esta komunidad a otros paizes, prinsipalmente Amerika i Evropa, i despues de 1948 a Israel. Komo konsekuensa de esto, menguo konsiderablamente el numero de los miembros de esta komunidad ke yega agora a serka de 2000 almas solo i ke lucha para mantener ainda las institusiones ke pueden asegurar una vida djudia. En primer lugar ay una eskola elementaria kon 150 elevos ke estudian en turko ma resiven tambien 15 oras semanalas de estudios djudaikos. Ay un azilo de viejos onde son kudyadas las personas aedadas de la komunidad ke tienen menester de asistensia; ay un ospital djudio, el de Karatash, ke resive pasientes djudios i non djudios, i ay enfin dos kales ke aseguran los servisios relijiozos, en desparte de algunos kales ke ya no son mas aktivos komo el kal Portugez i el kal de la Sinyora, ke estan siendo restorados agora, komo parte del patrimonio relijiozo i kultural de la komunidad.

[Orijen: www.aki-yerushalayim.co.il]