La “Carta Europèa de las Lengas Regionalas o Minoritàrias” a l’Assemblada nacionala francesa

Lo debat es plan seguit sus Twitter amb la participacion activa de qualques occitanistas 

Dimècres passat, comencèt a l’Assemblada Nacionala francesa lo debat per una proposicion de lei constitucionala per ratificar la Carta Europèa de las Lengas Regionalas o Minoritàrias, que França a pas jamai ratificat, 15 ans après n’aver signat qualques articles. Uèi se debanaràn lo debat final e lo vòte. L’etiqueta de Twitter #DirectAN ne seguís lo debat en dirècte amb la participacion activa de qualques occitanistas.

 

Aquela carta es destinada a protegir e promòure l’usatge de las lengas mal nomenadas regionalas dins totes los domenis umans (educacion, mèdias, servicis administratius, etc.) e se prepausèt en 1992. Dels 47 estats del Conselh d’Euròpa, 33 l’an signada e 25 l’an ratificada. L’estat francés la signèt en 1999 mas l’a pas jamai ratificada perque lo Conselh Constitucional decidiguèt en junh de 1999 qu’aquela carta èra contrària a l’egalitat de totes los ciutadans e a l’article 2 de la constitucion francesa, lo que ditz que “la lenga de la Republica es lo francés”.

 

La ratificacion de la Carta foguèt una promessa electorala del president de la Republica, François Hollande; e son primièr ministre, Jean-Marc Ayrault, o prometèt en decembre passat pendent la crisi bretona dels bonets roges, via lo depaus d’una proposicion de lei socialista per revisar la constitucion.

 

Fins ara lo debat es estat plan passionat e cal soslinhar l’intervencion del deputat provençal UMP, Henri Guaino, que defendèt la supremacia del francés e que se prononcièt contra la coexisténcia amb las autras lengas, o la del deputat ecologista breton Paul Molac, que defendèt la diversitat lingüistica e que quitament parlèt en breton e galò. Tanben cal remarcar la demanda que Jean-Luc Mélenchon a fach als deputats contra la ratificacion de la carta, en tot invocar l’edicte de Villers-Cotterêts.

 

Se pòt consultar totes los dorsièrs sul tèma, los emendaments e lo calandièr previst sus aqueste ligam.

 

Seguissètz sus Twitter lo debat, amb l’etiqueta #DirectAN, amb la participacion activa de @ForumOccitania, @TristanGahus, @Jujomabudisa entre d’autres raportaires occitans.

[Poblejat dins www.jornalet.com]