La presidenta de Brasil, Dilma Rousseff, anullèt son viatge previst en Japon e convoquèt ièr divendres una reünion d’emergéncia del govèrn davant la crisi provocada per las protèstas. Aital s’es creat un gabinet de crisi per far front a una de las situacions mai delicadas de l’istòria del país.
Èra pas solament pel prètz del transpòrt public qu’en Brasil se manifestava. E mai se lo govèrn a rebaissat lo prètz de la bilheta, mai d’un milion de personas manifestèron dijòus de ser dins aperaquí 80 vilas del país. Protèstan pas solament pel transpòrt public, mas per aver de servicis publics de qualitat.
Al delà, los indignats critican la corrupcion e lo naut còst dels eveniments esportius qu’organiza Brasil, coma la Copa Confederacions de fotbòl, la Copa del Mond de l’an que ven e los Jòcs Olimpics de 2016. Tocant la Copa Confederacions, que se disputa aquestes jorns, las protèstas se son entendudas dins los quites estadis, amb de crits e de bandieròlas de sosten als manifestants. Qualques esportius famoses tanben an sostengut las protèstas.
De faissisme dins lo movement e una paur de còp d’estat
De fonts prèpas dels manifestants an raportat a Jornalet que de grops faissistas populistas son a fòrabandir las esquèrras del movement. Se parla quitament d’ambient de còp d’estat.
Per paur, totes los movements d’esquèrra son a s’amassar per se protegir d’atacs que cèrcan de los fòrabandir del movement dels indignats.
[Image: Fernando Sampaio - poblejat dins www.jornalet.com]
Sem comentários:
Enviar um comentário