Lo primièr Musèu del Capitalisme, en Valonia

En seguida d’una vesita al Musèu del Comunisme de Praga, arunan, un grop d’amics de l’airal de Brussèlas se demandèron perqué i aviá pas, en contrapartida, cap de musèu del capitalisme dins lo Mond. Aquel simple comentari portèt una idèa que pauc a cha pauc se realizèt. Ara meteis, après clavar una reüssida campanha de microfinançament, an ja avançat lo primièr Musèu del Capitalisme, que serà itinerant a partir de l’an que ven, abans de s’establir dins qualque vila.

 

“Nos avisèrem [a Praga] que i aviá pas cap de musèu del capitalisme dins lo Mond, malgrat que i aja de nombrosas òbras e de conferéncias”, çò explican sul sit web del projècte, ont se detalha ja los quatre espacis de l’exposicion itineranta: la sala sus l’istòria e l’origina del capitalisme; la de las obtencions; la dels limits del sistèma; e la de las alternativas possiblas dins los païses occidentals, ont los vesitaires se pòdon tanben exprimir sul capitalisme e i daissar de comentaris.

 

Se vòl fin finala que lo public comprenga melhor lo sistèma que l’environa: “Al delà de saber las esperanças e los limits, s’agís de facilitar un espaci de reflexion e de debat sul capitalisme. A la sortida, cada vesitaire aurà obtengut, esperam, los instruments necessaris per consolidar melhor la siá ciutadaniá”.

 

Lo musèu dobrirà per lo primièr còp, de febrièr a junh de l’an que ven, a Namur (Valonia) e puèi, de setembre a decembre, anarà a Brussèlas. 

[Poblejat dins www.jornalet.com]