D’alternativas per esquivar lo programa estatsunidenc d’espionatge global

Un sit web amassa de servicis de tota mena qu’apertenon pas a cap de las nòu grandas entrepresas dels Estats Units, presumidament implicadas dins lo ret de l’NSA e l’FBI

Se n’es parlat, aquestes darrièrs jorns, que l’Agéncia Nacionala de Seguretat (NSA) dels Estats Units, amb l’FBI, avián un logicial nomenat PRISM per accedir als servidors de las grandas entrepresas d’Internet e, aital, obténer d’informacions sus de ciutadans, per l’intelligéncia e la seguretat del país. Aquela revelacion suscitèt un enòrme chepic dins tot lo Mond. Per ensajar d’esquivar PRISM, un sit web presenta una seguida de servicis alternatius als grands portals implicats.

Alavetz, PRISM Break amassa una lista de servicis de tota sòrta, basats sus un logicial liure, qu’aperten pas a cap de las nòu grandas entrepresas presumidament implicadas dins lo programa d’espionatge de l’NSA e l’FBI, e que son AOL, Apple, Facebook, Google, Microsoft, PalTalk, Skype, Yahoo! e YouTube.

En concret, s’i presenta d’alternativas en de categorias coma los sistèmas operatius d’ordenador e de telefòns mobils o, tanben, coma los navigadors, los cercadors, los servicis de transaccions economicas en linha, los clients de corrièr e de messatjariá instantanèa, los servidors de mapas, los magazins de donadas en nívol, los rets socials, los programas de videoconferéncia e d’albums fotografics. 

[Poblejat dins www.jornalet.com]