Brasil: an enebit que los jornalistas cobriscan una protèsta indigèna contra las centralas idroelectricas

Dos jornalistas foguèron expulsats e un tresen foguèt multat per informar sus l’ocupacion del sit idroelectric de Belo Monte

Lo jornalista François Cardona, un dels
que foguèt forçat de quitar lo chantièr 

Lo Jorn Internacional de la Libertat de Premsa, tres reportaires foguèron empedits de realizar la cobertura jornalistica de l’ocupacion del chantièr de la fabrica idroelectrica Belo Monte, lo divendres 3 de mai, dins l’estat de Pará, en Brasil. Dos d’eles foguèron fòrabandits per aperaquí cent òmes de divèrses còrses policièrs, e un tresen foguèt multat amb mila reals (aperaquí 380 èuros). Un activista foguèt tanben expulsat del chantièr.

 

Fasiá tres jorns que 200 indigènas aperaquí, pertanhent a uèch pòbles tocats per la construccion de las centralas idroelectricas suls flumes Xingu, Tapajós e Teles Pires, ocupavan lo principal chantièr del barratge, lo sit de Belo Monte, en exigissent que las òbras foguèsson suspendudas fins que lo govèrn federal de Brasil los escotèsse.

 

Aquel divendres, la justícia federala desestimèt una demanda d’expulsion facha per l’entrepresa Norte Energia contra los indigènas. Ça que la, lo Consòrci Constructor Belo Monte (CCBM) demandèt tanben a la justícia de l’estat que prononcièsse una expulsion contra los non-indigènas qu’èran dins lo chantièr. La jutgessa Cristina Sandoval Collier acceptèt la demanda que menèt a l’expulsion de dos jornalistas e a la multa del tresen.

 

Los tres jornalistas —lo fotograf de Reuters, Lunaé Parracho, lo jornalista del Conselh Indigenista Missionari, Ruy Sposati, e lo correspondent de Radio France Internationale (RFI) en Brasil, François Cardona— avián realizat la cobertura jornalièra dels eveniments que se debanavan a prepaus de l’accion dels indigènas contra lo bastiment de grands barratges qu’afèctan los lors territòris. RFI publiquèt dissabte passat un reportatge sus l’expulsion que patiguèt son correspondent.

 

Censura 

 

“Aquela decision es absoludament sens cap de sens”, çò ditz l’avocat de la Societat de l’Estat de Pará dels Dreches Umans (SDDH), Sérgio Martins. “Es tecnicament inconsistenta. I a un dotzenat de procèsses aicí coma aquò. Es coma se tota justificacion de la CCBM sufiguèsse per acceptar qué que siá de favorable a eles”, çò apondiá.

 

L’SDDH intrarà amb una accion en exigissent que se garentisca l’accès dels jornalistas a l’endrech de l’ocupacion.

 

Perilh 

 

Dins lor letra de dissabte 4, los indigènas qu’ocupan lo chantièr mostrèron lor chepic per l’enebiment de la premsa locala. Segon lor document, “la cobertura jornalistica nos ajuda fòrça a transmetre la nòstra votz pel Mond”.

 

“La nòstra protèsta es pacifica. Demandam d’èsser escotats. Perqué vòlon pas los jornalistas aicí?”, se demanda lo guerrièr Valdenir Munduruku. “Se quicòm se passèse, la responsabilitat seriá del govèrn”.

 

 

Ruy Sposati e Lunaé Parracho

[Image : Agência Raizes - poblejat dins www.jornalet.com]