Quebèc: los independentistas ganhan tornarmai las eleccions, dotze ans après

Lo Partit Quebequés de Paul St-Pierre Plamondon torna al poder e relança la question de l’independéncia

Escrich per Jòrdi Ràfols 

Lo Partit Quebequés (PQ) a ganhadas las eleccions en Quebèc e formarà un govèrn minoritari après aver obtengut 59 sètis, cinc sètis jos la majoritat absoluda, çò rapòrta Vilaweb. Aquela victòria escarta del poder la Coalicion Avenir Quebèc (CAQ), lo partit de centredrecha nacionalista e autonomista que governava fins ara e pèrd totes sos deputats a l’Assemblada Nacionala, lo parlament provincial.

Segon los resultats provisòris de la radiotelevision publica canadenca CBC, lo PQ, dirigit per Paul St-Pierre Plamondon, obtenguèt 59 sètis e 1,167 milion de voses (un 27,9%), siá cinc sètis de mens que la majoritat absoluda (64 sètis). Lo Partit Liberal de Quebèc, centrista e federalista, arribèt en segonda posicion amb 40 sètis e mai d’un milion de voses, mentre que lo Partit Conservator fa son intrada pel primièr còp al parlament quebequés, venent la tresena fòrça amb 19 sètis e mai de 870 000 voses. Quebèc Solidari, independentista e d'esquèrra radicala, arribèt en quatrena posicion amb 9 sètis e 520 000 voses, reculant a respècte de las eleccions de 2022, amb dos sètis de mens e una baissa de mai o mens tres ponches de son resultat electoral. Es lo primièr còp dempuèi son intrada al parlament quebequés, en 2008, que lo partit recuola.

La victòria del PQ remet sus la taula la promessa de St-Pierre Plamondon d’organizar un tresen referendum sus l’independéncia pendent las quatre venentas annadas, qu’auriá luòc après la partença de Donald Trump de la presidéncia dels Estats Units.

Lo primièr ministre canadenc, Mark Carney, felicitèt Paul St-Pierre Plamondon per sa victòria electorala e li prepausèt de trabalhar conjonchament. «Bastir un Quebèc mai fòrt es essencial per bastir un Canadà mai fòrt», çò declarèt Carney dins un messatge publicat suls rets socials. 

 

[Sorsa : www.jornalet.com]