Proposicion de lei per modificar l’article 2 de la Constitucion francesa e renforçar las lengas dichas regionalas

Una proposicion de lei constitucionala depausada lo 5 d’octòbre de 2026 a l’Assemblada Nacionala francesa vòl modificar l’article 2 de la Constitucion per facultar la proteccion e la promocion de las lengas dichas regionalas

Escrich per Manèl Navarro

Los deputats Peio Dufau (afiliat al grop socialista pels Pirenèus Atlantics) e Paul Molac (del grop LIOT per Mor-Bihan) son los principals promotors del tèxt, enregistrat jol numèro 3216. La proposicion benefícia ja del sosten de mai d’80 deputats de diferents grops, dels Republicans fins a La França Insomesa.

Que prepausa exactament lo tèxt?

Actualament, l’article 2 de la Constitucion establís que «la lenga de la Republica es lo francés». La proposicion vòl completar aquela disposicion amb la formulacion seguenta:

«La lenga de la Republica es lo francés, dins lo respècte de l’usatge, de la promocion e de la proteccion de las lengas regionalas.»

En mai d’aquò, prevei d’apondre a l’article 34 de la Constitucion una disposicion que balhe al Parlament la competéncia per fixar l’estatut de las lengas regionalas, en i inclusent lor usatge dins las administracions e los servicis publics.

Los promotors argumentan que l’interpretacion actuala de l’article 2 pel Conselh Constitucional a servit per s’opausar a las politicas de promocion de las lengas «regionalas», especialament dempuèi la censura parciala de la lei Molac de 2021, que limitava l’ensenhament immersiu. 

Cap de reaccion oficiala de Macron 

Fins ara, ni lo president Emmanuel Macron ni lo govèrn francés an pas fach cap de declaracion publica sus la proposicion. S’agís d’una iniciativa d’origina parlamentària que, per ara, a pas recebut ni sosten ni oposicion explicita de l’Elisi. 

Que se passariá se s’aprovava?

Se lo tèxt èra adoptat, lo francés contunhariá d’èsser l’unica lenga oficiala de la Republica, mas l’obstacle constitucional que dificulta actualament las mesuras de promocion de las lengas regionalas seriá levat. Lo legislator poiriá alara adoptar de leis qu’autorizarián l’ensenhament immersiu dins las escòlas publicas, la senhaletica bilingua o l’usatge de las lengas dichas regionalas dins de domenis administratius determinats.

Pasmens, lo cambiament seriá pas automatic: caldriá adoptar puèi de leis ordinàrias per desplegar aquel nòu encastre juridic. De mai, coma s’agís d’una proposicion parlamentària, son adopcion definitiva exigiriá un vòte en tèrmes identics a l’Assemblada Nacionala e al Senat, seguit d’un referendum obligatòri.

La proposicion se tròba encara dins una fasa fòrça preliminara. Es estada mandada a la comission de las leis de l’Assemblada Nacionala e, per ara, es pas estada inscricha a l’òrdre del jorn ni a suscitat de debat public a l’escala estatala.

 

[Sorsa: www.jornalet.com]